Qazaqstan memlekettik qyzmetti reformalaýdyń tıimdi sheshimderin qoldanýda - Veng Tat Hýeı
ASTANA. QazAqparat - Qazaqstan memlekettik qyzmetti reformalaýdyń tıimdi sheshimderin qoldanýda, dep esepteıdi Nazarbaev Ýnıversıtetiniń Memlekettik saıasat joǵarǵy mektebiniń dekany Veng Tat Hýeı.
«Qazaqstan halyqaralyq tájirıbelerdi júzege asyrý arqyly memlekettik qyzmetti reformalaýdyń óte tıimdi sheshimderin qoldanýda. Memlekettik saıasat mektebi atalǵan reformalardy jiti qadaǵalaýda jáne onyń iske asyrýda belsendi úles qosýǵa tyrysady. Biz Memlekettik qyzmet mınıstrligimen birge bul úrdiske ózimizdiń úlesimizdi qosyp ta kelemiz», - dep atap ótti ol Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, Memlekettik saıasat joǵarǵy mektebi halyqaralyq seriktesterimen birge túrli semınarlar ótkizip, Qazaqstannyń memlekettik qyzmet salasyn reformalaý baǵytyndaǵy eń ozyq álemdik tájirıbelerdi jınaqtaýǵa óziniń septigin tıgizgen.
«Bizde Sıngapýrda strategııalyq seriktesimiz bar. Ol mektep - memlekettik qyzmet salasynda reformalaýda jahandyq kóshbasshy atanǵan bolatyn. Memlekettik saıasat joǵarǵy mektebi AQSh, Sıngapýr, EÁDU elderimen birlesip kadrlardy basqarý, kandıdattardy irikteý jáne olardy damytý baǵytynda talqylaýlar men semınarlar uıymdastyrý arqyly osy iske úles qosty», - dedi Veng Tat Hýeı.
