Qazaqstan memlekettik qyzmetkerdiń eńbegin tóleý júıesin jetildirdi

ASTANA. QazAqparat - Qazaqstanda memlekettik qyzmetkerlerdiń eńbegin tóleý júıesi jetildirildi. Bul týraly Ortalyq kommýnıkatsııalar qyzmetindegi baspasóz máslıhatynda QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Aıgúl Shaıymova málim etti, dep habarlaıdy QazAqparat.

«Nátıje boıynsha eńbekti tóleýge kóshý tetikteriniń biri ázirlenip jatqan faktorly-baldyq mejeniń jobasy bolyp tabylady. Qoldanystaǵy tarıftik kesteden aıyrmashylyǵyna toqtalatyn bolsaq, faktorly-baldyq júıe oryndalatyn qyzmettiń aýqymyn, jaýapkershiligin jáne kúrdeligin eskere otyryp, tólem júıesin túzedi. Bundaı qadam atqarǵan jumysqa teńdeı jalaqy ustanymyna tolyqtaı jaýap beredi»,- dedi A. Shaıymova.

Sonymen qatar ol memapparat jumysynyń nátıjesi úshin jaýapkershilikti arttyrý úshin memlekettik qyzmetkerler jumysynyń tıimdiligin baǵalaýdyń júıesi engizildi. Onyń qorytyndysy bonýstardy tóleý nemese qyzmetkerlerdi yntalandyrýǵa sheshim qabyldaý úshin negiz bolady.

«A» korpýsyndaǵy memlekettik qyzmetkerdiń jumysyn baǵalaý jyl saıynǵy kelisim basymdyqtaryn júzege asyrýǵa negizdelgen.  «B» korpýsy memlekettik qyzmetkeriniń jumysy jeke jospar kórsetkishteri jetistikteriniń negizinde baǵalanady», - dedi ol.

Belgili bolǵandaı, «B» korpýsy memlekettik qyzmetkeriniń jumysy jeke jospar kórsetkishteri jetistikteriniń negizinde toqsan saıyn baǵalanady. Bıyl eki aralyq baǵalaý iske asyrylyp, bul rette tıisti nátıjeler aıqyndaldy. Bundaı baǵalaýdan 64,5 myń qyzmetker ótken kórinedi.  Osy rette «óte jaqsy» baǵasyn memlekettik qyzmetkerlerdiń 11 paıyzy, «tıimdi» kórsetkishin - 63 paıyzy, al «qanaǵattanarlyq» baǵasyn qyzmetkerlerdiń 26 paıyzy aldy.

Al «A» korpýsy qyzmetkerin alǵashqy baǵalaý bıyldyń jeltoqsanynda júrigiziledi.