Qazaqstan memlekettik qyzmet salasynda aımaqtyq kóshbasshy bolyp tabylady - Á. Báımenov
ASTANA. 7 qarasha. QazAqparat - Táýelsizdik jyldary júıeli júrgizilgen reformalar nátıjesinde Qazaqstanda halyqaralyq sarapshylardyń oń baǵasyn alǵan memlekettik qyzmet modeli qalyptasty.
Soǵan oraı, Qazaqstan memlekettik qyzmet salasynda aımaqtyq kóshbasshy bolyp tabylady. Búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik qyzmet máseleleri boıynsha ózgerister men tolyqtyrýlar engizý týraly» zań jobasyna baılanysty baıandaǵan QR Memlekettik qyzmet isteri agenttigi tóraǵasy Álıhan Báımenov osylaı málim etti.
Agenttik tóraǵasynyń aıtýynsha, atalmysh jetistikke negiz bolǵan faktorlardyń bastysy - memlekettik qyzmettiń kásibıligin arttyrý jáne memlekettik qyzmetshilerdi halyqqa qyzmet etýge beıimdeýge baǵyttalǵan Elbasy N. Nazarbaevtyń saıası jigeri. «Usynylyp otyrǵan zań jobasyna kelsek, onyń kúretamyry memlekettik qyzmetke eń laıyqty azamattardy iriktep, qabyldap, laýazymy joǵarylaǵanda olardyń abyroıyn, biliktiligin, eńbegin eskeretin júıeni qalyptastyrý. Sonymen qatar, zań jobasy «Qazaqstan-2030» strategııalyq baǵdarlamasyndaǵy «memlekettik qyzmet ultqa qyzmet etýdiń sınonımi bolýy tıis» degen Elbasy qaǵıdatyn júzege asyrýǵa baǵyttalǵan», - deıdi Á. Báımenov.
Onyń aıtýynsha, zań jobasynda negizinen kadrlardy irikteý men joǵarylatý kezinde merıtokratııa qaǵıdatyn kúsheıtý, «A» basqarý korpýsyn qurý, personaldy basqarý ınstıtýttary men tetikterin jetildirý sharalary kózdeledi. Kadr qyzmetiniń mártebesi men ókilettikterin arttyrý, tártiptik jáne etıkalyq baqylaýdy kúsheıtip, korporatıvtik mádenıetti jetidirý qarastyrylady.
«Zań jobasynda memlekettik qyzmetke irikteýdiń móldirligi men jarııalyǵyn jáne ádildigin ornatýǵa baǵyttalǵan sharalar qamtylyp otyr. Bul rette testileý naqty memlekettik organdardaǵy konkýrstyq irikteýden tys táýelsiz ótkiziletin bolady. Testileýde alǵan baǵasyna qaraı azamattarǵa konkýrsqa qatysýǵa quqyq beretin sertıfıkat tapsyrylady. Bunyń nátıjesinde konkýrs ótkizý ýaqyty úsh esege, ıaǵnı 15-20 kúnge deıin qysqarmaq», - deıdi agenttik tóraǵasy.
