Qazaqstan memleket tarıhynyń mereıli mejesine álem qaýymdastyǵynyń qurmetine ıe bolǵan el retinde jetip otyr
ASTANA. KAZINFORM - Memleket basshysy Qasym-Jomart Toqaev Respýblıka kúnine arnalǵan saltanatty jıynda sóz sóıledi, dep habarlaıdy Aqordanyń baspasóz qyzmeti.
«Ulyq merekemiz – Respýblıka kúni barshańyzǵa qutty bolsyn! Bul – búkil halqymyz úshin mán-maǵynasy erekshe jáne qasterli meıram! 25 qazanda aqjoltaı qujat – Qazaqstannyń Egemendigi týraly deklaratsııa qabyldandy.
Dál sol kúni ult jylnamasynyń jańa kezeńi bastaldy. Kóp uzamaı óz aldyna derbes el atandyq. Tarıhı ádildik ornap, qasıetti qazaq jerine Táýelsizdiktiń altyn qazyǵy qaǵyldy. Sondyqtan bul kúndi Uly daladaǵy memlekettilik dástúri qaıta jańǵyrǵan kún dep aıtsaq, artyq emes, dedi -Prezıdent.
Bıyl biz ulttyq merekeni el Táýelsizdiginiń 35 jyldyǵy qarsańynda atap ótip jatyrmyz. Qazaqstan osy memleket tarıhynyń mereıli mejesine qarqyndy damyp kele jatqan, álem qaýymdastyǵynyń qurmetine ıe bolǵan el retinde jetip otyr.
Halqymyz egemendik jyldarynda kóptegen belesti abyroımen eńserdi. Ulttyq bolmysymyzdyń myzǵymas nyshandary – memlekettik rámizderimiz bekitildi. Kók Týymyz Birikken Ulttar Uıymynyń tórinde jelbiredi.
Ulttyq qarjy júıesi quryldy. Memlekettik shekaramyz shegendeldi.
-Qasıetti Saryarqanyń tórinde, burynǵy eski qalanyń ornynda búkil dúnıe júzin tańǵaldyrǵan, álem moıyndaǵan jańa elordamyz – Astananyń irgesi qalandy. Biz birligimizdi bekemdep, jer júzine beıbitshilik besigi retinde tanyldyq,-dedi Memleket basshysy.
