Qazaqstan mektepterine oqýshylardy kásiptik baǵdarlaýǵa arnalǵan jańa tsıfrlyq qural engizilmekshi

ASTANA. KAZINFORM – Y. Altynsarın atyndaǵy Ulttyq bilim akademııasy «Eńbek resýrstaryn damytý ortalyǵy» AQ-men birlesip oqýshylarǵa kásiptik baǵdar berýdiń «Oqýshynyń qyzyǵýshylyqtary men daǵdylarynyń ıkemdi beıini» (OQDIB) tsıfrlyq ádistemesin ázirledi. Bul týraly Oqý-aǵartý mınıstrligi málim etti.

Atalǵan bastama bolashaq kásipti erte jastan sanaly tańdaýdy qalyptastyrýǵa baǵyttalǵan jáne 7-9 synyp oqýshylaryna arnalǵan. Bul ádisteme oqýshylarǵa qyzyǵýshylyqtaryn aıqyndaýǵa, qabiletterin anyqtaýǵa jáne odan ári damý úshin ońtaıly baǵyttardy tańdaýǵa kómektesedi. Ázirleme qazaqstandyq mazmunǵa beıimdelgen jáne elimiz boıynsha 10 myńnan astam oqýshy qatysqan synaqtan ótken.

—  Bul qural ýnıversıtetterdiń 400-den astam baǵdarlamasy, kolledjderdiń 200-ge jýyq mamandyǵy men jumysshy kásipterin biriktiretin Mansap kompasy tsıfrlyq platformasyna engizilgen. Platforma oqýshylardyń, pedagogterdiń jáne ata-analardyń jeke kabınetterine qol jetkizýdi qamtamasyz ete otyryp, bir tsıfrlyq keńistikte júıeli kásiptik baǵdarlaýdy qamtamasyz etedi. Test nátıjeleri avtomatty túrde óńdeledi: oqýshylar — jeke aqyl-keńester, pedagogter — zamanaýı súıemeldeý quraldaryn, al ata-analar — balanyń damý saraptamasy men dınamıkasy týraly aqparat alady, — dep atap ótti Altynsarın akademııasynyń prezıdenti Názıpa Aıýbaeva.

Joba jalpy bilim beretin mektepterge zamanaýı, turaqty jáne bolashaqqa baǵdarlanǵan kásiptik baǵdarlaý júıesin qurýǵa jaǵdaı jasap, árbir balaǵa bolashaq kásibı jolyn sanaly tańdaýǵa múmkindik berdi.

Aıta keteıik, mektepke deıingi bilim salasynda vaýcherlik qarjylandyrý júıesi osy jyldyń sońyna deıin tolyq engiziledi.