Qazaqstan mektepterine frantsýz tili oralsa deımiz – Emmanıýel Makron
Memleket basshysy Qasym-Jomart Toqaev Frantsııa prezıdenti Emmanıýel Makronmen Aqordadaǵy keńeıtilgen quramdaǵy kezdesý kezinde Qazaqstanda frantsýz tiliniń qoldanys aıasyn keńeıtý jóninde pikir bildirdi, dep habarlaıdy Kazinform agenttigi.
«Men óte konstrýktıvti ótken betpe-bet pikir almasýymyzǵa alǵys aıtqym keledi. Buǵan deıin aıtqanymdaı, Qazaqstan Frantsııamen seriktestik baǵytyndaǵy mindettemelerin nyq ári adal oryndaıdy. Biz Frantsııamen strategııalyq seriktestigimizge senemiz. Jýyqtaǵy pikir almasýymyzdan keıin keleshektegi ózara yqpaldastyǵymyzdyń birneshe basym salasyn aıqyndadyq. Onyń ishinde energetıka, jańartylatyn qýat kózderi, tranzıt jáne logıstıka, aýyl sharýashylyǵy, densaýlyq saqtaý, tsıfrlandyrý, sondaı-aq, bilim salalary bar», - dedi Qasym-Jomart Toqaev.
Memleket basshysynyń sózinshe, eki eldiń áriptestik aýqymy óte ártaraptanǵan.
«Men osy basym baǵyttardyń iske asatynyna, aldaǵy jyldary bizdiń halyqtarymyzdyń ıgiligin arttyratynyna kámil senemin. Sondaı-aq, biz halyqaralyq deńgeıdegi dıalogtarymyzdy nyǵaıtý jóninde pikir almastyq. Óńirdegi jáne jahandaǵy kún tártibinde turǵan máseleler boıynsha ózara jaǵymdy ári ornyqty yqpaldastyǵymyzdyń mańyzyn atap óttik. Onyń bári búgin qabyldanatyn birlesken málimdememizde kórinis tabady. Biz frantsýz mádenıetin, frantsýz tilin Qazaqstanda ilgeriletýdiń mańyzyn sóz ettik. Biz óz tarapymyzdan bul mańyzdy salada birge jumys isteýge barynsha kúsh salamyz. Men Qazaqstan halqy úshin Frantsııa týraly, sizderdiń baı mádenıetterińiz týraly kóbirek bilý, frantsýz tilin meńgerý óte mańyzdy dep oılaımyn», - dedi Qasym-Jomart Toqaev.
Bul jaıynda mártebeli meıman da oı qosty.
«Mádenı, adamı baılanystardy nyǵaıtqymyz keledi. Qarym-qatynasymyzdyń osy qyryn damytsaq deımiz. Qazirgiden de tereń baılanys ornatqymyz keledi. Mysaly qazaq mektepterine frantsýz tilin oqytý tájirıbesi qaıta oralǵany mańyzdy», - dedi Frantsııa Prezıdenti Emmanıýel Makron.
Eske salaıyq, Frantsııa Prezıdenti Emmanıýel Makron resmı saparmen Qazaqstanǵa keldi.
Qasym-Jomart Toqaev Aqordada Frantsııa Prezıdenti Emmanıýel Makrondy qarsy aldy.
Qazaqstan men Frantsııa prezıdentteri shaǵyn quramda kelissóz júrgizdi.
Makron bul sapar ekijaqty seriktestik úshin mańyzdy jylmen tuspa-tus kelip otyrǵanyn aıtty.
Qazaqstan Prezıdenti óz sózinde Frantsııa – Qazaqstannyń Eýropadaǵy óte mańyzdy seriktesi ekenin atap ótti.
Sondaı-aq, Prezıdent kezdesý kezinde bilim jáne ǵylym salasyndaǵy jobalardy qolǵa alýǵa erekshe kóńil bólingenin jetkizdi.
Memleket basshylarynyń kezdesýinen keıingi qos eldiń qarym-qatynasy qaı baǵytta damýy múmkin?
Aıta ketý kerek, Qazaqstan Prezıdenti Qasym-Jomart Toqaevtyń Frantsııaǵa byltyr jasaǵan resmı sapary aıasynda 35 qujatqa qol qoıylǵan bolatyn.
