Elimizdegi mektepterde tamaqtaný talaptary jańartyldy
ASTANA. KAZINFORM – QR Densaýlyq saqtaý mınıstriniń buıryǵymen densaýlyq saqtaý jáne bilim berý uıymdaryndaǵy tamaqtaný talaptaryna ózgerister engizildi.
Qujatta negizgi uǵymdar naqtylanyp, mektepterde tamaqtanýdy uıymdastyrý tártibi qaıta qaraldy. Soǵan sáıkes medıtsına qyzmetkerleriniń mindetteri de ózgertildi.
Endi medıtsına qyzmetkeri:
· durys tamaqtaný qaǵıdalaryn engizip, onyń saqtalýyn qadaǵalaıdy;
· taǵam sapasyn baqylaý komıssııasynyń jumysyna qatysady;
· taǵam taratylar aldynda as daıyndaıtyn jerde daıyn astyń sapasyn kún saıyn tekserip, nátıjesin jýrnalǵa tirkeıdi;
· erekshe taǵamdy qajet etetin oqýshylardyń tizimin jasap, olardyń tamaqtanýyn baqylaýda ustaıdy;
· oqýshylar, ata-analar men muǵalimderge aýrýdyń aldyn alý jáne salaýatty ómir salty týraly dárister men semınarlar ótkizedi;
· mázir ózgergen jaǵdaıda taǵamnyń mólsherin, quramyn jáne qýattylyǵyn qadaǵalaıdy;
· ashana qyzmetkerleriniń densaýlyǵyn apta saıyn tekseredi.
Qujatta balalardyń durys tamaqtaný ádetin qalyptastyrýǵa erekshe mán berilgen. Osy maqsatta mektepterde tárbıelik jáne túsindirý sharalary júrgiziledi.
Atap aıtqanda:
· oqýshylarǵa durys tamaqtaný men salaýatty ómir salty týraly túsinik berý úshin densaýlyq buryshtaryn uıymdastyrý;
· durys tamaqtaný jáne onyń densaýlyqqa áseri týraly plakattar, jadynamalar men býkletter ázirlep, ilý jáne taratý;
· «Qaýipsizdik sabaqtary» aıasynda jylyna keminde eki ret durys tamaqtanýǵa arnalǵan synyp saǵattaryn ótkizý;
· oqýshylar men olardyń ata-analaryna tamaqtaný ádebi, taǵamnyń paıdasy men zııany týraly túsindirý;
· durys tamaqtanýdy nasıhattaıtyn baıqaýlar men aktsııalar uıymdastyrý;
· «Durys tamaqtaný aptalyǵyn» ótkizý;
· mektep ashanalarynda taǵamǵa qosymsha tuz qospaý arqyly tuz tutynýdy azaıtý (as ústelderinen tuz salǵyshtardy alyp tastaý);
· oqýshylar men ata-analarǵa durys tamaqtaný týraly aqparatty messendjerler arqyly taratý.
Sonymen qatar mektep ashanalary men tamaqtaný oryndarynda satylatyn azyq-túlikke qoıylatyn talaptar da jańartyldy.
Budan bólek, qujatta bilim berý uıymdaryndaǵy tamaqtaný normalary belgilengen.
Buıryq 2026 jylǵy 31 naýryzdan bastap kúshine enedi.
Aıta keteıik, buǵan deıin Qazaqstanda 218 myń oqýshy jańa formattaǵy mektepterde bilim alyp jatqanyn jazǵan edik.