Qazaqstan mektepterinde kúzgi demalys bastaldy: oqýshylar 1 qarashaǵa deıin demalady
ASTANA. KAZINFORM — Kúzgi demalys 2026 jylǵy 26 qazannan 1 qarashaǵa deıin qosa eseptegende jeti kúnge sozylady. Oqý 2026 jylǵy 2 qarashada jalǵasady. Bul týraly Oqý-aǵartý mınıstrligi málim etti.
Mınıstrliktiń málimetinshe, Memleket basshysy Qasym-Jomart Kemeluly Toqaevtyń tapsyrmasymen elimizde balalardyń qosymsha bilim alý múmkindikteri keńeıip keledi.
— Qazaqstanda 2,9 myńǵa jýyq qosymsha bilim berý uıymy jumys isteıdi. Óner jáne mýzyka mektepteri, oqýshylar saraılary, sport mektepteri men shyǵarmashylyq ortalyqtar balalarǵa qyzyǵýshylyǵyna saı qabiletin damytýǵa múmkindik beredi, — delingen habarlamada.
Kúzgi demalys kezinde balalar otbasymen ýaqyt ótkizip, kitap oqyp, sportpen jáne shyǵarmashylyqpen aınalysa alady. Mektepter balalardyń bos ýaqytyn mazmundy ótkizýge arnalǵan sharalar usyna alady. Olarǵa qatysý erikti. Balalardyń qyzyǵýshylyǵy men otbasynyń jospary eskerilýi tıis.
Mundaı sharalardy uıymdastyrý pedagogterge qosymsha ákimshilik júkteme túsirmeýi jáne eseptilikti kóbeıtpeýi tıis.
Sharalar uıymdastyrylǵan jaǵdaıda olardy ótkizýge jáne balalardyń qaýipsizdigine jaýapty tulǵalar aldyn ala belgilenedi. Balalardyń qatysýy ata-analarmen kelisiledi. Mektepten tys sharalarda jaýapty eresekterdiń birge júrýi qamtamasyz etilýi qajet.
Qurmetti ata-analar! Balalaryńyzǵa úıde, kóshede jáne ınternette qaýipsizdik erejelerin saqtaýdyń mańyzyn túsindirip, saq bolýdy eskertińizder.
