Qazaqstan mektepterinde erekshe nazardy qajet etetin balalarǵa pedagogıkalyq súıemeldeý engiziledi
ASTANA. KAZINFORM - Elimizdiń barlyq mektepterinde erekshe pedagogıkalyq nazardy qajet etetin kámeletke tolmaǵandarǵa jeke pedagogıkalyq súıemeldeý engiziledi. Bul shara táýekel tobyndaǵy oqýshylardy erte anyqtaýǵa jáne olarǵa bilim berý uıymdarynda maqsatty psıhologııalyq-pedagogıkalyq kómek kórsetýge baǵyttalǵan.
QR Oqý-aǵartý mınıstrligi baspasóz qyzmetiniń habarlaýynsha, jańashyldyq 2025 jylǵy 30 jeltoqsanda Memleket basshysy qol qoıǵan «Quqyq buzýshylyqtardyń aldyn alý týraly» Qazaqstan Respýblıkasynyń Zańynda kózdelgen. Norma 2026 jylǵy 2 naýryzdan bastap kúshine endi. Qazirgi ýaqytta Oqý-aǵartý mınıstrligi pedagogıkalyq súıemeldeý qaǵıdalaryn bekitý baǵytynda jumys júrgizip jatyr.
Pedagogıkalyq súıemeldeý bilim berý uıymynyń profılaktıka keńesiniń sheshimimen taǵaıyndalady. Árbir bala úshin naqty qoldaý sharalary men jaýapty mamandar kórsetiletin jeke profılaktıkalyq jumys jospary ázirlenedi.
Erekshe pedagogıkalyq nazardy qajet etetin balalar sanatyna oqýynda qıyndyqtary bar, sabaqtardy sebepsiz júıeli túrde qaldyratyn, qoǵamǵa jat minez-qulyq tanytatyn, quqyq buzýshylyq jasaǵan, zorlyq-zombylyqqa ushyraǵan nemese ómirlik qıyn jaǵdaıǵa tap bolǵan oqýshylar jatady.
Súıemeldeý aıasynda pedagogtar men mektep psıhologtary balamen jeke jumys júrgizedi, ata-analarmen ózara is-qımyl qamtamasyz etiledi, qajet bolǵan jaǵdaıda áleýmettik qyzmetter tartylady. Bul sharanyń maqsaty - kámeletke tolmaǵandar arasyndaǵy quqyq buzýshylyqtardyń aldyn alý jáne balalarǵa der kezinde kómek kórsetý.
Osyǵan deıin mektep oqýshylaryna kún saıyn 2 saǵat dene tárbıesi sabaǵy engizilgeni týraly jazdyq.