Qazaqstan mektepterinde alǵashqy áskerı daıyndyqtyń jańa standarty engizildi
ASTANA. KAZINFORM — Qazaqstanda tártiptiń mazmunyn aıtarlyqtaı ózgertetin jáne Qarýly kúshterdiń oqýshylardy qyzmetke daıarlaýǵa qatysýyn nyǵaıtatyn alǵashqy áskerı daıyndyqtyń jańartylǵan qaǵıdalary bekitildi. Qorǵanys mınıstri buıryqqa 4 qarashada qol qoıdy. Bul týraly vedomstvonyń baspasóz qyzmeti málim etti.
— Qujatty Bas shtabtyń Uıymdastyrý-jumyldyrý jumysy departamenti áskerı qyzmet jáne áskerı-patrıottyq tárbıe týraly zańnamaǵa engizilgen túzetýlerdi eskere otyryp ázirledi. Erejeler mektepterde, kolledjderde jáne kásiptik bilim berý mekemelerinde alǵashqy áskerı daıyndyqty uıymdastyrý men oqytýdyń biryńǵaı tásilderin belgileıdi, pedagogterge qoıylatyn talaptardy naqtylap, kýrstyń praktıkalyq quramdas bóligin keńeıtedi, — delingen habarlamada.
Negizgi ózgeristerdiń biri «alǵashqy áskerı daıyndyq» tarıhı ataýynyń pánge qaıta oralýy boldy. Baǵdarlama áskerı qyzmetshilerdiń quqyqtary, mindetteri men áleýmettik kepildikteri týraly praktıkalyq elementterdi, oqý-dalalyq sabaqtardy kóbeıtý jáne túsindirý jumystaryn keńeıtý esebinen kúsheıtiledi.
Qazaqstan Respýblıkasy Qorǵanys mınıstriniń keńesshisi Aıgúl Tólembaeva jańartýlar bolashaq áskerge shaqyrylýshylardy daıarlaý sapasyn arttyrýǵa baǵyttalǵanyn atap ótti.
— Biz pándi onyń naqty mazmunyna saı etemiz. Bul azamattardy armııaǵa daıyndaýdyń birinshi kezeńi. Balalar áskerı qyzmetshiniń jarǵysyn, mindetterin, qyzmetten keıingi quqyqtary men kepildikterin túsinýi kerek. Búgingi ásker — bul naqty mamandyq pen bilim alýdyń múmkindigi. Mektep oqýshylarynyń bul jaıly aldyn ala bilgenin qalaımyz, — dedi ol.
Oqytýshylarǵa qoıylatyn talaptar aıtarlyqtaı ózgeredi. AÁD-ny mamandyǵy boıynsha pedagogıkalyq bilimi jáne áskerı qyzmet ótkerý tájirıbesi bar azamattar ǵana júrgize alady. Pán boıynsha jumys isteıtin muǵalimder óz laýazymdaryn saqtaıdy. Keminde on jyl eńbek sińirgen áskerı qyzmetshiler úshin Qorǵanys mınıstrliginiń áskerı oqý oryndarynyń bazasynda tegin pedagogıkalyq qaıta daıarlaý múmkindigi engiziledi.
Bul sheshimniń kadrlyq bazany nyǵaıtyp, oqýshylardyń pánge degen senimin arttyratynyn aıtaqan Mınıstrdiń keńesshisi:
— Oqýshylar áskerde qyzmet etken adamdy kórýi kerek. Bul qorqynysh pen senimsizdikti boldyrmaıdy, ári armııanyń qalaı jumys isteıtinin túsindirýge múmkindik beredi, — dedi.
Jańartylǵan erejeler áskerı bólimderdiń rólin keńeıtedi: oqý-dalalyq jıyndardyń praktıkalyq quramdas bóligi kúsheıtiledi, bólimshe komandırleri jekelegen sabaqtarǵa qatysyp, dalalyq bazany kórsetedi. AÁD oqytýshylarynyń biliktiligin arttyrý budan bylaı áskerı joǵary oqý oryndarynyń, kafedralardyń jáne Qorǵanys mınıstrliginiń vedomstvolyq baǵynysty uıymdarynyń bazasynda ǵana júrgiziledi. Bul ózekti áskerı tájirıbege qol jetkizýge yqpal etedi.
Eske sala keteıik, byltyr merzimdi áskerı boryshyn ótegen áskerı qyzmetshiler myńnan astam bilim grantyn alǵanyn jazdyq.