Qazaqstan mektepteriniń terrorızmge qarsy qorǵanysy tekserilip jatyr

NUR-SULTAN. QazAqparat – Elimizdegi barlyq mekteptiń terrorızmge qarsy qorǵanysy tekserilip jatyr. Bul týraly QR ІІM Ákimshilik polıtsııa komıtetiniń tóraǵasy Murat Baımuqashev málim etti, dep habarlaıdy QazAqparat tilshisi.

«Іshki ister mınıstrligi Qazandaǵy oqıǵaǵa baılanysty ishki ister organdary basshylarymen shuǵyl jıyn ótkizdi. Ulttyq bilim berý júıesindegi mekemelerdegi balalar men eresek adamdardyń qaýipsizdigin qamtamasyz etý máselesi qaraldy. Memleket basshysynyń tapsyrmasymen qysqa ǵana ýaqyttyń ishinde bilim berý organdarymen birge búkil mekteptiń terrorızmge qarsy qorǵanysy zerdelenetin bolady. Bul jumysty taıaý kúnniń ishinde aıaqtaımyz», - dedi komıtet tóraǵasy Іshki ister mınıstrliginde ótken baspasóz máslıhatynda.

Onyń atap ótýinshe, atalǵan jumystyń nátıjesinde Úkimetke barlyq bilim berý uıymdaryn qajetti tehnıkamen jabdyqtaý jáne ótkizý rejımin kúsheıtý boıynsha usynystar toptamasy engiziledi.

«Іshki ister mınıstrligi qoǵamdyq qaýipsizdikti qamtamasyz etýdi jáne balalar máselesin basty nazarda ustaıdy. Bul máselege qoǵam bolyp mán berý kerek», - dedi Murat Baımuqashev.

Eske sala keteıik, 11 mamyrda Tatarstannyń Qazan qalasyndaǵy mektepte belgisiz eki adam oq jaýdyrǵan bolatyn.

Atys kezinde 8 adam qaza taýyp, taǵy 21-i zardap shekti.

Osy oqıǵaǵa baılanysty Memleket basshysy Qasym-Jomart Toqaev Reseı Federatsııasynyń Prezıdenti Vladımır Pýtınge kóńil aıtty.

Tatarstan Prezıdenti Rýstam Mınnıhanov 12 mamyrdy respýblıkada aza tutý kúni dep jarııalady.