Qazaqstan mektepterinde «Jasyl sabaq» ótti
ASTANA. QazAqparat - Búgin «Qazaqstan - 2050» jalpyulttyq qozǵalysynyń uıymdastyrýymen elimiz mektepterinde 1 mıllıonnan asa oqýshynyń qatysýymen «Jasyl sabaq» ótti. Bul jaıynda atalǵan ortalyqtyń baspasóz qyzmetinen málim etti, dep habarlaıdy QazAqparat.
«Jasyl sabaq» jobasynyń negizgi maqsaty - oqýshylarǵa ekologııalyq baǵyttaǵy tárbıe berý, tabıǵı resýrstardy tıimdi paıdalanýǵa beıimdeý jáne kommýnaldyq ıgilikterdi utymdy tutyný qaǵıdalaryn úıretý.
Joba aıasynda psıhologtar men pedagog mamandardyń arnaıy qatysýymen «Jasyl sabaq» atty ádistemelik quraly ázirlendi. Ádistemelik qural mektep muǵalimderine kómekshi bolsa, oqýshylarǵa tanymdyq oqýlyq retinde yńǵaıly etip daıyndalǵan. Ádistemelik qural balalardyń jas erekshelikterine sáıkes keledi.
«Qazaqstan - 2050» jalpyulttyq qozǵalysy Keńesiniń tóraǵasy Muhtar Mankeevtiń aıtýynsha, atalǵan joba qorshaǵan ortany qorǵaýǵa úles qosatyn bolady.
«Osy jobany júzege asyrý arqyly oqýshylarǵa aýyz sý men elektr qýatyn uqypty jáne tıimdi paıdalanýdy úıretýdi kózdeımiz. Kúndelikti turmysta asa mán bere qoımaıtyn qatty turmystyq qaldyqtardy utymdy joldarmen joıý jáne olardy qaıta paıdalaný múmkindigin de qarastyramyz. Atmosferaǵa zııandy qaldyqtardyń tastalýyn azaıtý men qorshaǵan ortany saqtaý úshin jasyl tehnologııalardy qoldanýǵa baýlıtyn bolamyz», - dedi M.Mankeev.
Jobanyń maqsaty - Qazaqstanda azamattyq qoǵam negizderin qalyptastyrý men damytýǵa yqpal etý.
Joba Qazaqstanda azamattyq qoǵam negizderin qalyptastyrý men damytýǵa yqpal etý maqsatynda Ult kóshbasshysy N.Nazarbaevtyń bastamasymen 2013 jyly qurylǵan «Qazaqstan-2050» jalpyulttyq qozǵalysy» QB úkimettik emes uıymynyń bastamasy boıynsha ázirlendi. Ony júzege asyrýǵa «SAMRUK-KAZYNA TRUST» áleýmettik jobalardy damytý qory men Qazaqstan Respýblıkasynyń Bilim jáne ǵylym mınıstrligi qoldaý kórsetti.
