Qazaqstan mektepterinde kún energııasy ilki jobasy júzege asyrylady
QR Energetıka mınıstrligi, Astana qalasynyń ákimdigi, «Nazarbaev zııatkerlik mektepteri» derbes bilim berý uıymy jáne «Shell» kompanııasy arasynda rásimdelgen memorandýmnyń maqsaty - «Mektepterge kún energııasy» pılottyq jobasyn iske asyrý. Joba aıasynda Astana, Almaty, Aqtaý, Atyraý jáne Oral qalalaryndaǵy Nazarbaev zııatkerlik mektepterinde kún fotoelektr júıelerin ornatý kózdelgen.
Memorandýmǵa QR Energetıka mınıstri Qanat Bozymbaev, Astana qalasynyń ákimi Áset Isekeshev, «NZM» DBU basqarma tóraıymy Kúlásh Shámshıdınova jáne Qazaqstandaǵy «Shell» kontserniniń vıtse-prezıdenti jáne tóraǵasy Olıve Lazar myrza qol qoıdy.
«Mektepterge kún energııasy» bastamasy Qazaqstanda jańartylatyn energııa kózderin damytýǵa baǵyttalǵan QR Energetıka mınıstrligi men «Shell» kompanııasy arasyndaǵy tabysty yntymaqtastyq nátıjesinde týyndady. Osy jobany iske asyrý elimizdiń aımaqtarynda qýaty az jańartylatyn energııa kózderin paıdalanatyn qondyrǵylardy odan ári qoldaný úshin ózindik platformaǵa aınalatyndyǵyna senemiz. Osylaısha elde parnıktik gazdardyń shyǵaryndylaryn azaıtý men jańartylatyn energııa kózderi salasynda nysanaly ındıkatorlarǵa qol jetkizý boıynsha Úkimettiń jumysyna óz úlesin qosady dep úmittenemiz», - dedi QR Energetıka mınıstri Qanat Bozymbaev.
Al Olıve Lazar «Shell» jáne Qazaqstan Respýblıkasy arasynda qalyptasqan ózara áriptestik qarym-qatynasty joǵary baǵalaıtyndyǵyn jetkizdi.
«Osy memorandým aıasynda biz kún fotoelektr júıelerin mektep shatyrlaryna qondyrý boıynsha yntymaqtastyq jasaıtyn bolamyz. Atalǵan joba jańartylatyn energııa kózderin tıimdi paıdalanýdyń jaqsy úlgisi bolady jáne bolashaqta elimizdiń ózge aımaqtarynda da keńinen taraýy múmkin»,- dedi Astana qalasynyń ákimi Áset Isekeshev.
