Qazaqstan mektepterinde durys tamaqtanýdyń onkúndigi ótip jatyr
ASTANA. QazAqparat - 1-10 sáýiri aralyǵynda Qazaqstannyń barlyq óńirlerinde «Úılesimdi tamaqtaný - densaýlyq negizi!» uranymen mektepte tamaqtandyrýdy uıymdastyrý jóninde onkúndik ótkiziledi, dep habarlady mzsr.gov.kz
Onkúndik sheńberinde tamaq ónimderiniń sapasyn jáne qaýipsizdigin baqylaý, oqýshylardy ystyq tamaqpen jáne taza sýmen qamtamasyz etý máseleleri boıynsha dóńgelek stol jáne baspasóz koferentsııalary; mektepterde tyıym salynatyn tamaq ónimderiniń satylmaýyn qadaǵalaý jáne baqylaý jónindegi qoǵamdyq reıdter; durys tamaqtanýdy uıymdastyrý boıynsha medıtsınalyq qyzmetkerler men aspazdarǵa arnalǵan semınar-trenıngter, «Vıtamınder jáne densaýlyq», «Densaýlyqqa paıdaly tamaq ónimderi» taqyrybyndaǵy fotokonkýrstar jáne t.b. sharalar ótedi.
Búgingi kúni adamnyń ómir súrý uzaqtyǵyn 10-15 jylǵa qysqartatyn artyq salmaq jáne semizdik ólim-jitimniń negizgi qaýip-qateri. Dúnıejúzilik densaýlyq saqtaý uıymynyń aqparaty boıynsha, búkil álemde artyq salmaq 170 mıllıonǵa jýyq balada bar.
2012 jyly Salaýatty ómir saltyn qalyptastyrý problemalary ulttyq ortalyǵy júrgizgen 5-shi ulttyq áleýmettik zertteýdiń qorytyndysy boıynsha, energetıkalyq sýsyndardy qalalyq balalardyń 25,5%-y, aýyldyq jerdegi balalardyń 22,7%-y tutynady. Tez daıarlanatyn taǵamdy tutynatyn balalardyń sany qalalyq jerde 13,7%-dy, aýyldyq jerde 13,3%-dy quraıdy. Jalpy respýblıka boıynsha fast-fýdty kúnine bir ret 13,7%-ǵa jýyq bala tutynady.
2014 jylǵy mamyrda Dúnıejúzilik densaýlyq saqtaý assambleıasynyń 57-shi sessııasynda qabyldanǵan Tamaqtaný, dene belsendiligi jáne densaýlyq jónindegi ǵalamdyq strategııa mekteptegi durys tamaqtanýdy uıymdastyrý boıynsha sharalar qabyldaýǵa usynystar jasady. QR Bas sanıtarlyq dárigeriniń 2007 jylǵy naýryzdaǵy qaýlysymen gazdalǵan jáne alkogolsiz energetıkalyq sýsyndardy, maıǵa qýyrylǵan kartopty, qytyrlaýyqty satýǵa tyıym salynǵanyn atap ótý kerek.
Onkúndikdiń ótkizilýi óskeleń urpaqtyń densaýlyǵyn saqtaý men nyǵaıtý úshin durys tamaqtanýdyń mańyzdylyǵy týraly halyqtyń habardarlyǵyn arttyrýǵa múmkindik bermek.
