Qazaqstan mektepteri kedergisiz orta qurýǵa daıyn ba - mınıstrdiń jaýaby
ASTANA. QazAqparat - QR Bilim jáne ǵylym mınıstri Erlan Saǵadıev ınklıýzıvti bilim berýge jaǵdaı jasaý jumystary týraly baıandady, dep habarlaıdy QazAqparat tilshisi.
«Barlyq mektepti qaıta jabdyqtap shyǵý úshin óte kóp qarajat pen ýaqyt kerek. Mektepterimizdiń basym bóligi eski jáne bastapqyda onda kedergisiz orta qurý qarastyrylmaǵan. Ýnıversıtetterde múgedekterge arnalǵan lıft ornatý - óte qymbat sharýa. Máseleni ońaı sheshetin amaldy kórip turǵan joqpyz», - dep jaýap berdi Erlan Saǵadıev Úkimet úıinde jýrnalıster suraǵyna.
Onyń aıtýynsha, pandýs máselesi az ǵana ýaqytta sheshilip kele jatyr.
«Kóptegen mektepter pandýs salýmen aınalysyp jatyr. Pandýstar - birinshi qabatqa ǵana aparatyn jol, osy nátıjeniń ózi de jaman emes. Bizdiń qazirgi mindetimiz - barlyq mektepter men uıymdardy pandýspen qamtamasyz etý, keıinirek múmkindigi shekteýli adamdarǵa arnalǵan lıft qoıý máselesin de qarastyra jatarmyz»- dedi Saǵadıev.
Aıta keteıik, búgin QR Eńbek jáne halyqty áleýmettik qorǵaý mınıstri Mádına Ábilqasymova múmkindigi shekteýli 10 myńnan astam balanyń mektepke bara almaı otyrǵanyn málimdedi.
Osyǵan baılanysty, mınıstr Ábilqasymova Bilim jáne ǵylym mınıstrligine ınklıýzıvti bilim berýdi damytý maqsatynda kadrlardyń jetispeýshiligi, ınklıýzıvti bilim berý júıesin ádistemelik qamtamasyz etý, kedergisiz orta qurý sheńberinde bilim berý uıymdarynyń materıaldyq-tehnıkalyq bazasyn nyǵaıtý sııaqty máselelerdi sheshý qajettigin eskertti.
