Qazaqstan mektepke deıingi bilim berý boıynsha úzdik ondyqqa kiredi- BǴM
NUR-SULTAN. QazAqparat - Elimiz mektepke deıingi bilim berý boıynsha aldyńǵy elder qatarynda. Bul týraly QR Bilim jáne ǵylym mınıstrliginiń jaýapty hatshysy Aryn Órsarıev málim etti, dep habarlaıdy QazAqparat tilshisi.
«Qazir bizdiń el bilim berý salasynda álem elderi arasynda joǵary pozıtsııada tur. Naqty aıtqanda, mektepke deıingi bilim berý boıynsha Qazaqstan úzdik ondyq elderdiń qataryna kiredi. Bul óte jaqsy kórsetkish. Bul degenimiz «Balapan» baǵdarlamasynyń durys júzege asyrylýy, oǵan dálel qazaqstandyq balalar 95% mektepke deıingi bilim berýmen qamtylǵan. Sondaı-aq elimiz orta bilim berý boıynsha da jaqsy kórsetkishterge ıe. Atap aıtqanda, TIMSS halyqaralyq baǵdarlamasy boıynsha biz úzdik 30-dyqqa kiremiz. Árıne sheshilýi tıis máseleler joq emes» - dedi A.Órsarıev elordada ótken ustazdar kúnine arnalǵan merekelik keshte.
Onyń sózine sensek, bilim salasyndaǵy kúrdeli máselelerdiń biri pedagogtardyń mártebesi.
«Táýelsizdik alǵaly kóptegen zertteýler men saraptama jasaldy. Sol sekildi túrli zertteýler nátıjesinde baıqaǵanymyz bizde pedagog mártebesiniń tıisti deńgeıde bolmaýy. Sonymen qatar, biz muǵalimderdiń jalaqysy boıynsha Ortalyq Azııa boıynsha biraz elderden arttamyz», - dedi ol.
Eske sala ketsek, keshe elordada ustazdar kúnine oraı «Qaldyrǵan iziń mángilik» atty merekelik shara ótti.
