Qazaqstan Meksıkadaǵy áıelder quqyǵyn qorǵaý jónindegi Jahandyq forýmǵa qatysty
Forým áıelder jaǵdaıy jónindegi dúnıejúzilik konferentsııanyń 25 jyldyq qorytyndysyn shyǵarýǵa jáne Pekın deklaratsııasy men is-qımyl platformasyn qabyldaýǵa arnalǵan alǵashqy aýqymdy is-shara bolyp tabylady. Oǵan úkimetter, parlamentshiler, azamattyq qoǵam, kásipodaqtar men BAQ qatysýda.
Іs-shara Meksıka men Frantsııa úkimetteriniń bastamasymen «BUU-áıelder» qurylymynyń qoldaýymen ótkizilýde. Ortalyq Azııa óńirinen tek Qazaqstan ǵana qatysýǵa ótinim berdi. Bizdiń elimiz Ekonomıkalyq ádilettilik pen zorlyq-zombylyqqa qarsy is-qımyl koalıtsııalarynyń jumysyna qatysady.
Qazaqstandyq delegatsııany QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Lazzat Ramazanova basqardy.
Óz sózinde ol Qazaqstannyń Tuńǵysh Prezıdenti - Elbasy Nursultan Nazarbaevtyń bastamasy boıynsha elimizde Áıelder isteri jáne otbasylyq-demografııalyq saıasat jónindegi ulttyq komıssııa syndy ınstıtýtsıonaldyq mehanızm qurylǵanyn atap ótti. Komıssııa eldegi áıelderdiń múmkindikterin keńeıtýge baılanysty keń aýqymdy máselelerdi sheshýge járdemdesýge arnalǵan.
«Búgingi tańda Ulttyq komıssııanyń joǵary mártebesi oǵan bıliktiń zań shyǵarýshy jáne atqarýshy tarmaqtarynyń, sondaı-aq azamattyq qoǵamnyń tıimdi áriptestik tetikterin qurý men qamtamasyz etýde keń ókilettikter beredi. Joǵary jáne jergilikti ókildi organdarda áıelderdiń úlesin arttyrý boıynsha qabyldanyp jatqan sharalar, elimizdiń barlyq óńirlerinde áıelderdi qoldaý jónindegi baǵdarlamalar, sondaı-aq otbasylyq jáne genderlik saıasat tujyrymdamasyn iske asyrý Qazaqstannyń genderlik damý ındeksinde joǵary pozıtsııaǵa ıe bolýyna múmkindik berdi», - dep málimdedi Lazzat Ramazanova.
Qazaqstandyq delegatsııanyń basshysy áıelderdiń múmkindikterin keńeıtý máseleleri elimizdiń ishki kún tártibinde ǵana emes, halyqaralyq deńgeıde de ózekti bolyp tabylatynyn atap ótti. Lazzat Ramazanova forýmǵa qatysýshylardy Qazaqstanda qurylyp jatqan áıelder men erler quqyqtarynyń teńdigi salasyndaǵy bilim ortalyǵy bazasynda yntymaqtastyqqa shaqyrdy. Sonymen qatar ol Forým búkil álemdegi genderlik progrestiń katalızatory bolady degen úmitin bildirdi.
Aıta keteıik, Forým Mehıkoda 29-31 naýryz aralyǵynda ótedi jáne óz jumysyn jazda Parıjde aıaqtaıdy. Іs-shara aıasynda 2025 jylǵa deıingi kópjaqty áriptestik baǵdarlamalaryn bastaý rásimi ótkiziledi.
