Qazaqstan megapolısterinde 5G standartyndaǵy uıaly baılanys testileýden ótedi

NUR-SULTAN. QazAqparat – Nur-Sultan, Almaty jáne Shymkentte 5G standartyndaǵy uıaly baılanys testileýden ótedi, dep habarlaıdy QazAqparat QR Tsmfrlyq damý, ınnovatsııalar jáne aeroǵarysh ónerkásibi mınıstrliginiń baspasóz qyzmetine silteme jasap.

«Qazaqstanda 5G jelisin engizýge qatysty saýaldar kóbeıgendikten, QR Tsıfrlyq damý, ınnovatsııalar jáne aeroǵarysh ónerkásibi mınıstrligi mynadaı málimet beredi:

Qazaqstan Respýblıkasy Radıojıilikter jónindegi memlekettik vedomstvoaralyq komıssııasy eldiń úsh qalasynda – Nur-Sultan, Almaty jáne Shymkentte 5G standartyndaǵy uıaly baılanysty testileýden ótkizý týraly sheshim qabyldady.

Eshqandaı operatordyń eksklıýzıvti quqyǵy bolmaıdy, jospar kestesine sáıkes 5G uıaly baılanysyn synaý múmkindigi belgili bir ýaqytqa «Qazaqtelekom» AQ, «Kar-Tel» JShS, «Ksell» AQ, «Mobaıl Telekom-Servıs» JShS berildi.

5G standartyndaǵy uıaly baılanystyń kommertsııalyq turǵyda usyný merzimin naqty aıtý ázirshe múmkin emes»,-delingen habarlamada.

Sondaı-aq onda qazirgi tańda zań jobasy QR Parlamenti Senatynyń qaraýynda ekeni aıtylǵan.

«Bul másele tolyqtaı zań júzinde rettelgen soń ǵana konkýrs (nemese aýktsıon) nátıjesi boıynsha jeńgen operator 5G standartyn kommertsııalyq qoldanysqa engizetin bolady».