Qazaqstan medıtsınalyq týrızmdi damytpaq
ASTANA. KAZINFORM — Elordada densaýlyq saqtaý, turaqty damý jáne medıtsınalyq týrızm máselelerine arnalǵan forým ótti. Bul týraly Týrızm jáne sport mınıstrligi málim etti.
Medıtsınalyq týrızm – elimizdegi eń áleýetti baǵyttardyń biri. Іs-sharaǵa memlekettik organdar, halyqaralyq uıymdar, medıtsınalyq ortalyqtar, bilim berý mekemeleri, úkimettik emes uıymdar jáne 30-ǵa jýyq elshiliktiń ókilderi qatysty.
– Qazaqstan medıtsınalyq jáne saýyqtyrý týrızminiń óńirlik ortalyǵyna aınalýǵa bar jaǵdaı jasalǵan. Ol úshin sheteldik patsıentterge qyzmet kórsetýdiń biryńǵaı standarttaryn engizý, klınıkalar men týroperatorlar arasyndaǵy baılanysty kúsheıtý jáne elimizdi emdelý men ońaltýdaǵy senimdi baǵyt retinde tanytý qajet, – dedi QR Týrızm jáne sport mınıstri Erbol Myrzabosynov jıynnyń ashylý saltanatynda.
Mınıstr 2023 jyly Astanada em alǵan sheteldik patsıentter sany 2022 jylmen salystyrǵanda tórt ese, al 2024 jyly taǵy eki ese artqanyn atap ótti. Bul – otandyq medıtsına men kórsetiletin qyzmet sapasyna degen qyzyǵýshylyq artyp kele jatqanyn dáleldeıdi.
– Birneshe jyl buryn biz elimizdegi medıtsınalyq týrızmniń áleýetin talqylaıtynbyz. Qazir sol áleýet shyndyqqa aınaldy dep senimmen aıtýǵa bolady. Keıingi bes jylda týrıster aǵyny bes eseden astam ósti, sonyń ishinde medıtsınalyq týrızm de aıtarlyqtaı artty. Qazaqstan álem kartasynda medıtsınalyq týrızmniń jańa ortalyǵyna aınalyp keledi. Ásirese Qytaıdan (24 ese), Úndistannan (40 ese) jáne Túrkııadan (3 ese) keletin týrıster tarapynan qyzyǵýshylyq erekshe. Elimiz qoljetimdi baǵadaǵy joǵary sapaly medıtsınalyq qyzmet kórsetetin memleket retinde bedelin nyǵaıtyp keledi, – dedi Densaýlyq saqtaý mınıstri Aqmaral Álnazarova forýmnyń ashylý saltanatynda.
Medıtsınalyq týrızmdi damytý jáne salalar arasyndaǵy yntymaqtastyqty arttyrý maqsatynda Týrızm jáne sport mınıstrligi men Densaýlyq saqtaý mınıstrligi arasynda ózara yntymaqtastyq týraly memorandýmǵa qol qoıyldy.
Forým aıasynda salamatty qalalyq ortany qalyptastyrý, buqaralyq sport pen salamatty ómir saltyn damytý, sondaı-aq bilim berý bastamalaryna arnalǵan taqyryptyq sessııalar ótti. Jıynǵa qatysýshylar «Qazaqstannyń salamatty qalalary» jelisin qurý bastamasyna erekshe nazar aýdardy.
Forým sońynda Týrızm jáne sport mınıstri Erbol Myrzabosynov pen Densaýlyq saqtaý mınıstri Aqmaral Álnazarova otandyq medıtsınanyń ınnovatsııalyq jetistikteri men tehnologııalary usynylǵan iri medıtsınalyq ortalyqtar men uıymdardyń kórmesin tamashalady.
Eske sala keteıik, buǵan deıin Qazaqstan álemdik medıtsınanyń jańa tartylys ortalyǵyna aınalyp kele jatqanyn jazǵan edik.