Qazaqstan medıtsınalyq týrısterge arnalǵan «bir tereze» júıesin engizedi
ASTANA. KAZINFORM – Qazaqstanda sheteldik patsıentterge arnalǵan «bir tereze» qaǵıdaty boıynsha qyzmet kórsetý júıesi qurylady, dep habarlaıdy Densaýlyq saqtaý mınıstrligi.
Mınıstrlik 2030 jylǵa deıin medıtsınalyq týrızmdi damytýǵa arnalǵan tujyrymdamalyq tásilderdi ázirledi. Jańa júıe sheteldik patsıentterge alǵashqy ótinish bergen sátten bastap em aıaqtalǵanǵa jáne keıingi medıtsınalyq baqylaýǵa deıin tolyq súıemeldeý qyzmetin usynýdy kózdeıdi.
– Biryńǵaı servıs arqyly patsıentter Qazaqstan medıtsınasynyń múmkindikteri týraly aqparat alyp, medıtsınalyq uıymdy tańdaı alady. Sondaı-aq qajetti qujattardy rásimdep, konsýltatsııa alyp, kelý men ornalasý máselelerin uıymdastyryp, emdeýdiń barlyq kezeńinde qoldaýǵa ıe bolady, – delingen habarlamada.
Medıtsınalyq týrızmniń jańa modelin iske asyrý aıasynda jeti negizgi baǵyt boıynsha jumys júrgizý josparlanyp otyr.
Olardyń qatarynda ulttyq jáne óńirlik deńgeıde medıtsınalyq týrızmdi úılestirýdiń biryńǵaı júıesin qalyptastyrý, ortaq normatıvtik talaptar ázirleý, medıtsınalyq kómektiń sapasy men qaýipsizdigin qamtamasyz etý bar.
Sonymen qatar básekege qabiletti medıtsınalyq qyzmetter toptamasyn aıqyndaý, Qazaqstannyń halyqaralyq deńgeıdegi tanymaldyǵyn arttyrý jáne medıtsınalyq uıymdardy yntalandyrý tetikterin engizý kózdelgen.
Mınıstrliktiń málimetinshe, jańa model sheteldik azamattardyń Qazaqstanda medıtsınalyq kómek alý protsesin jeńildetedi. Sonymen birge otandyq densaýlyq saqtaý júıesiniń básekege qabilettiligin arttyryp, medıtsınalyq qyzmetter eksportyn ulǵaıtýǵa jáne qosymsha ınvestıtsııalar tartýǵa múmkindik beredi.
Joba Qazaqstannyń Ortalyq Azııadaǵy óńirlik medıtsınalyq hab retindegi ornyn nyǵaıtýǵa baǵyttalǵan.
– 2030 jylǵa qaraı Qazaqstanǵa medıtsınalyq kómek alý maqsatynda keletin sheteldik azamattardyń jyl saıynǵy sanyn 800 myń adamǵa deıin jetkizý josparlanyp otyr, – dep atap ótti mınıstrlikten.
Aıta keteıik, Qazaqstanda mektep medıtsınasynyń jańa standarty engiziledi.
