Qazaqstan medıtsınasynyń 82 qyzmetkeri «Eńbek ardageri» medalimen marapattaldy
Bul týraly QR DSÁDM baspasóz qyzmeti habarlady.
Ujymdy kásibı merekesimen quttyqtaǵan Mınıstr Tamara Dúısenova densaýlyq saqtaý - ómirge kelgennen bastap qarııalyq shaqqa deıin adam balasymen qatar júretin jalǵyz sala ekenin atap kórsetti. Sondyqtan, dárigerler qyzmetiniń ár kúninde, ár mınýtynda, tipti ár sekýndynda azamattardyń ómir sapasyn jaqsartýǵa úles qosady.
«Memleket basshysy densaýlyq saqtaý salasy aldyna 2050 jylǵa qaraı el azamattarynyń ómir súrý uzaqtyǵyn 80 jáne odan kóp jasqa jetkizý, halyqqa medıtsınalyq qyzmet kórsetýdiń básekege qabiletti jáne tıimdi júıesin qurý, medıtsınalyq týrızmdi damytý sııaqty aýqymdy mindetter qoıdy. Bul mindetterdi abyroımen atqaryp shyǵatynymyzǵa senimim mol. Ol úshin aıanbaı eńbek etý kerek. Óıtkeni, júıeli jumystar arqyly ǵana ult densaýlyǵynyń áleýetin qalyptastyrý, básekege qabiletti densaýlyq saqtaý júıesin qurý sııaqty maqsattarǵa jete alamyz», - dedi Tamara Dúısenova.
Baıandamasynyń qorytyndysynda mınıstr barlyǵyna kásibı qyzmette tabysqa jetýdi, bolashaqqa senimmen qaraýdy, baq-bereke, turaqtylyq jáne densaýlyq tiledi.
Saltanatty jıyn barysynda QR DSÁDM-niń 18 qyzmetkeri vedomstvolyq marapat aldy.
Sonymen qatar shara barysynda mınıstrlik qyzmetkerlerine «Qazaqstan halqy Assambleıasyna 20 jyl» mereıtoılyq medalderi jáne «Altyn dáriger» tósbelgisimen, «Meniń Qazaqstanym» poezy respýblıkalyq aktsııasy aıasynda alǵys hattarymen marapattaldy.
Shara qorytyndysynda ákimshilik memlekettik qyzmetke qabyldanǵan jas mamandar ant qabyldady.
Medıtsınalyq qyzmetkerler kúni qarsańynda QR DSÁDM vedomstvolyq marapattaryn respýblıkanyń barlyq óńirinen 1135 adam aldy. Onyń ishinde 82 ardager «Eńbek ardageri» medalimen marapattaldy. Taǵy 1053 maman «Densaýlyq saqtaý isine qosqan úlesi úshin», «Densaýlyq saqtaý isiniń úzdigi» tósbelgilerimen, qurmet gramotalarymen jáne alǵys hattarmen marapattaldy.