Qazaqstan medıtsınasynda balalarǵa perıtonealdy dıalız jasaý tájirıbesiniń alǵashqy jyly qorytyndylandy

Qazaqstanda balalarǵa bul em Ulttyq ana men bala ortalyǵynda 2009 jyldyń 21 qarashasynan bastap jasala bastady. Konferentsııada belgili bolǵanyndaı, sodan bergi ýaqytta ortalyq bazasynda 17 bala emdelgen. Onyń 3-ýi dúnıe esigin jańa ashqan birneshe aılyq náreste.

Dárigerlerdiń aıtýynsha, bunyń aldyndaǵy jyldary dıalız em-domyn alý úshin, qazaqstandyq balǵyndar syrt memleketterge barýǵa májbúr bolǵan.

«Perıtonealdy dıalız pedıatrııalyq tájirıbe úshin teńdessiz bolyp tabylady. Ol jansaqtaý bóliminde sozylmaly búırek qyzmeti jetispeýshiligine dýshar bolǵan naýqastarǵa jasalatyn kómek kezinde taptyrmaıtyn em ekeni daýsyz»,-deıdi Ulttyq medıtsınalyq hodıng» AQ basqarmasy tóraǵasynyń medıtsınalyq máseleler jónindegi orynbasary Tamara Voşenkova.

Onyń aıtýynsha, perıtonealdy dıalız degenimiz - arnaıy apparat arqyly, ıaǵnı adamnyń qanyn súzgilerdiń kómegimen tazartý. Súzgiden qan ótkende qajetsiz qaldyqtar qalyp qoıady da, tazarǵan qan qaıta aǵzaǵa quıylady. Naýqastyń jaǵdaıyna baılanysty qan bir aptada eki-úsh ret tazartylyp otyrýy tıis. Jalpy, adamdardyń bundaı dertke shaldyǵýy búırektiń bolmashy aýrýyna nemquraıdy qaraýdan týyndaıdy.

«Bul emdeý ádisiniń bizdiń Qazaqstanda, Ulttyq ana men bala ortalyǵynyń pedıatrııa bólimine engizilgenine bir jyl toldy. Búgin biz sol jumystyń nátıjeleri men qorytyndylaryn shyǵarýdamyz. Atqarylǵan isterdiń nátıjesi jaǵymdy. Bizdiń elde osyndaı em ary qaraı damyp jatsa - quba-qup»,-deıdi T.Voşenkova.

Halyqaralyq ǵylymı-tájirıbelik konferentsııaǵa Reseı jáne Qazaqstannyń nefrologııa jáne gemodıalız salasynyń aldyńǵy qatarly mamandary qatysyp otyr.