Qazaqstan medıtsınasy Ebolaǵa qarsy kúreske úles qosa alady - reseılik ǵalym
ASTANA. QazAqparat - Qazaqstan medıtsınasy jınaqtaǵan mol tájirıbe Ebolaǵa qarsy kúreske úles qosa alady.
Bul týraly Transfýzıologtardyń Halyqaralyq qoǵamynyń Shyǵys Eýropa jáne TMD boıynsha basshysy, reseılik professor Evgenıı Jıbýrt málim etti.
«Qazirgi ýaqytta Dúnıejúzilik densaýlyq saqtaý uıymy usynyp otyrǵan Ebolanyń basty saqtyq joly bul em-domǵa kóngen adamnyń qan plazmasyn quıý bolyp tabylady. Degenmen aýrý keń taralǵan aımaqtardaǵy halyq Ebolamen ǵana emes, ózge de vırýstyq ınfektsııalarǵa shaldyqqan. Sondyqtan Dúnıejúzilik densaýlyq saqtaý uıymyna búginde plazma men trombotsıtterdegi túrli patogenderden aryltý baǵytynda jumys jasap júrgen qazaqstandyq medıtsına ǵalymdarynyń mol tájirıbesin paıdalanýdy usynar edim», - dedi ol.
Onyń sózine qaraǵanda, Qazaqstanda donorlyq qandy eki kezeń boıynsha tekserý jumysy álemdik tájirıbege saı keledi jáne postkeńestik memleketterge úlgi bolyp tabylady.
«Biz donorlardy eki kezeń boıynsha skrınıngtik tekseristen ótkizý tájirıbelerińiz jaıly bilemiz. Qazaqstan postkeńestik aımaqta trombotsıtterdi patogenderden aryltýǵa qol jetkizgen alǵashqy memleket atanbaq», - dep atap ótti. E. Jıbýrt.
