Qazaqstan medıtsınada salasynda jasýsha tehnologııalaryn qoldaný boıynsha álemdik kóshbasshy elge aınaldy

Bul týraly búgin Astanadaǵy Densaýlyq saqtaý mınıstrliginiń Ulttyq ǵylymı medıtsınalyq ortalyǵynda «Ǵalamdyq kóshbashylyqqa jetý» jobasynyń birinshi kezeńin júzege asyrý máselesine arnalǵan baspasóz máslıhatynda málim boldy.   

Eske sala ketsek, diń jasýsha tehnologııalary salasyndaǵy Qazaqstannyń, onyń ishinde Ulttyq medıtsınalyq ǵylym akademııasynyń jetken jetistikterine tánti bolǵan amerıkalyq «Stemedica» kompanııasy «Ǵalamdyq kóshbasshylyqqa jetý» jobasyna teń seriktes retinde qatysýǵa usynys jasaǵan bolatyn. 5 jylǵa josparlanǵan osy jobanyń barysy týraly búgin Ulttyq medıtsınalyq ortalyqta sóz boldy.

«2010 jyly 1 shildede Elbasynyń joldaýyn júzege asyrý sheńberinde Ulttyq ǵylymı medıtsınalyq ortalyqta jasýsha tehnologııalar, olardy medıtsınada qoldaný jáne «FDA» (AQSh) sertıfıkattaǵan «Diń jasýshalarynyń master qory» zerthanasyn ashý salasyndaǵy qazaqstandyq-amerıkalyq jobanyń tusaýkeseri bolǵan edi. Memleket basshysynyń qoldaýynyń arqasynda bizde osylaısha kóptegen elderde táýekel baǵytynda sanalatyn jasýsha tehnologııalaryn qoldanýdyń qarjylyq jáne tehnologııalyq múmkindigi paıda boldy. Kóptegen elderde túrli sebepterge oraı, ondaı múmkindikterge resmı rúuqsattar berilmeı keledi, al Qazaqstanda buny synaqtan ótkizýden bólek, osy baǵytta emdeýge de ruqsat alynyp otyr», - dedi jıyn barysynda «Ulttyq ǵylymı medıtsınalyq ortalyq» AQ basshysy Abaı Baıgenjın.

Onyń aıtýynsha, Elbasynyń kóregendiligi arqasynda sonaý 2003 jyldan bastap UǴMO aıasynda diń jasýshalarynyń (stvoldyq kletkalar) alǵashqy klınıkalyq synaqtary jasala bastady. Osy ýaqyt aralyǵynda qazaqstandyq mamandar asa aýyr sanalatyn aýrý túrlerine bir-birinen bólek  ártúrli 7 baǵyt boıynsha zertteýler jasady. «Rasynda, buǵan deıin resmı medıtsına ıgere almaı kelgen baǵytta jumystar órbidi. Máselen, bul baýyr aýrýymen, eki tıptegi qant dıabeti aýrýlarymen, sondaı-aq ortalyq nerv júıesimen baılanysty, sozylmaly búırek aýrýlary, býyn aýrýlaryna qatysty bolatyn.  Búgingi kúni biz bul qyzmettiń aýqymyn keńeıtip, júrek-qan aınalymy aýrýlaryn, ımmýndy aýrýlardy da emdeýdi óolǵa ala bastadyq. Sonyń arqasynda biz halyqaralyq deńgeıge shyqtyq. 2010 jyldan beri resmı túrde AQSh tarapynan áriptesterimizben birlesip jumys isteı bastadyq. Der  ýaqytynda qolǵa alǵan múmkindikterimizdiń arqasynda biz diń jasýshalaryn qoldanyp emdeýge qatysty AQSh «FDA» departamentiniń ruqsatyn alyp otyrmyz. Bul jasýsha tehnologııalary ózimizde jáne AQSh-ta ǵana jasalady. Osyǵan deıingi atqarylǵan jumystyń arqasynda 2009 jyldan beri shetelderden kóptegen patsıentterdi emdeýdi sátti júzege asyryp kelgenimizdi habarlaǵym keledi», - deıdi A. Baıgenjın.

Toqtala ketetin jaıt, Astanada emdelgen sheteldik patsıentter arasynda Kýáıt, Arab Ámirlikteri, AQSh, Taıvan, Gongknog, Koreıa, Reseı jáne basqa da elderden kelgen azamattar bar. Olardyń barlyǵy naýqastyń asa aýyr sanatyna jatady. Sondaı-aq, búgingi kúni diń jasýshalaryn qoldanyp emdeýge AQSh patsıentterimen kelisimsharttar jasalǵan. Oǵan sáıkes, emdeý UǴMO bazasynda júzege asady. Bul rette AQSh-tyń alǵashqy patsıentteri Astanaǵa emdelýge 2010 jyly jeltoqsan aıynda kelgen. Al 2012 jyldyń 4 tamyzynda klınıkaǵa AQSh-tan nevrologııalyq aýrýǵa shaldyqqan 11 patsıent keldi. Olarǵa keshendi tekserý jáne FDA sertıfıkattaǵan adam diń jasýshalaryn qoldanýmen em jasalady. «Qazirgi kezde barlyq patsıentterge diń jasýshalary transplanttaldy.Olar klınıkada qaralýda, ózderin jaqsy sezinip keledi», - deıdi A. Baıgenjın.