Qazaqstan-Majarstan bıznes forýmynda birqatar kelisimderge qol qoıyldy

QR Ulttyq ekonomıka mınıstri Rýslan Dálenovtiń aıtýynsha, búginde Qazaqstanda Majarstan kapıtaly salynǵan 40-tan astam kásiporyn jumys isteıdi. Atalǵan kompanııadar qurylys, aýyl sharýashylyǵy jáne óndiristik salalarda qyzmet etedi. "Qazaqstan men Majarstan geografııa jaǵynan bir-birinen alys ornalasqan. Soǵan qaramastan Qazaqstan TMD elderi ishinde Majarstannyń 4-shi iri áriptesi bolyp sanalady. Bizdiń saýda-ekonomıkalyq jáne ınvestıtsııalyq salada áleýetimiz zor. Osy áleýetimizdi barynsha paıdalanýymyz qajet. Máselen, byltyr eki eldiń taýar aınalymy 139 mıllıon AQSh dollaryn qurady. Atalǵan kórsetkishti áli de arttyrýǵa bolady", - dedi R.Dálenov forýmnyń ashylý rásiminde.

Al Majarstannyń Premer-mınıstriniń orynbasary - Qarjy mınıstri Mıxaı Varganyń sózine qaraǵanda, Qazaqstanǵa kelgen iskerlik delegatsııanyń quramynda 100-den astam adam bar. Buǵan deıin ondaı úlken delegatsııa kelmegen. Olardyń ishinde sý sharýashylyǵy, medıtsına, aýyl sharýashylyǵy, mashına jasaý, kólik jáne taǵy basqa salalardyń ókilderi bar. "Qazaqstan men Majarstannyń saıasat salasyndaǵy qarym-qatynastary joǵary. Osy baılanystardy ekonomıkalyq turǵyda barynsha kúsheıtýimiz kerek. Sonyń arqasynda ortaq tarıxy bar qazaq pen majar xalyqtaryn jaqyndastyra alamyz", - dep atap kórsetti M.Varga.

Forým barysynda birqatar qujattarǵa qol qoıyldy. Sonyń ishinde "Astana Sý Arnasy" MKK men "Býdapesht sý arnasy" JAQ arasyndaǵy kelisim, "Astana" Halyqaralyq qarjy ortalyǵynyń bırjasy men KELER CENTRAL DEPOSITIRY LTD arasyndaǵy memorandým, QR Prezıdenti is basqarmasynyń Medıtsınalyq ortalyǵy men Majarstannyń adam resýrstary mınıstrligi arasyndaǵy memorandým, sondaı-aq, mádenı mura, sport pen strategııalyq zertteýler boıynsha birneshe kelisim bar. Al QR Ulttyq ekonomıka mınıstri Rýslan Dálenov pen Majarstannyń Premer-mınıstriniń orynbasary - Qarjy mınıstri Mıxaı Varga ekonomıkalyq yntymaqtastyq salasyndaǵy ózara túsinistik týraly memorandýmdy rásimdedi.