Qazaqstan maıly daqyldar alqabyn 500 myń gektarǵa ulǵaıtady
«Jospar úsh negizgi bólimnen turady, onda 31 is-sharany oryndaý kózdelgen, onyń ishinde 18 is-shara fızıkalyq qoljetimdilikti qamtamasyz etý jóninde, 6 is-shara ekonomıkalyq qaýipsizdikti qamtamasyz etý jóninde jáne 7 is-shara ónimniń qaýipsizdigi men sapasyn qamtamasyz etýge baǵyttalǵan», - dedi mınıstr.
Aıtýynsha, 18 is-shara boıynsha negizgi oryndaýshy Aýyl sharýashylyǵy mınıstrligi. Sondaı-aq,– Saýda jáne ıntegratsııa mınıstrligine 5 is-shara boıynsha, Ekologııa, geologııa jáne tabıǵı resýrstar mınıstrligi men jergilikti atqarýshy organdarǵa 2 is-sharadan, Densaýlyq saqtaý, Energetıka, Eńbek jáne halyqty áleýmettik qorǵaý, Ulttyq ekonomıka mınıstrlikterine 1-1 is-sharadan aıqyndalǵan.
«Birinshi bólim aýyl sharýashylyǵy ónimderi óndirisiniń kólemin ulǵaıtý jónindegi is-sharalardy iske asyrýǵa baǵyttalǵan jáne 18 is-sharany, onyń ishinde 1 jedel jáne 17 orta merzimdi is-sharany qamtıdy.
Máselen, úsh jyl ishinde maıly daqyldar alańdaryn 3 mln gektardan 3,5 mln gektarǵa deıin, kartop alańdaryn 200 myń gektardan 215 myń gektarǵa deıin, jemdik daqyldaryn 3,6 mln gektardan 4,2 mln. gektarǵa deıin ulǵaıtý jolymen ósimdik sharýashylyǵynda ártaraptandyrý júrgiziletin bolady», -dedi Erbol Qarashókeev.
Sondaı-aq, mınıstr úsh jyl ishinde iri qara mal basyn 9 mln basqa deıin, usaq maldy 20,1 mln basqa deıin, jylqy basyn 4 mln basqa deıin ulǵaıtý josparda bar ekenin atap ótti.
«Kartopty, kókónis pen jemis saqtaý jónindegi ınvestıtsııalyq jobalardy iske asyrý 2022 jyly saqtaý qýatyn 98,3 myń tonnaǵa, 2023 jyly – 104,5 myń tonnaǵa, 2024 jyly – 19,6 myń tonnaǵa arttyrýǵa múmkindik beredi», - dedi vedomstvo basshysy.