Qazaqstan maı ónerkásibi eksportyn 1 mlrd dollarǵa jetkizýdi josparlap otyr

ASTANA. KAZINFORM – Qazaqstan 2028 jylǵa qaraı maı jáne toń maı ónimderiniń eksportyn jylyna 1 mlrd AQSh dollaryna deıin ulǵaıtpaq. Mundaı mindet Astanada ótken maı ónerkásibin damytýǵa arnalǵan Jol kartasyn tanystyrý barysynda aıtyldy.

Bul Jol kartasy 2026-2028 jyldarǵa arnalǵan salany keshendi qoldaý men damytý boıynsha sharalar keshenin qamtıdy: shıkizat tapshylyǵyn joıý, agrotehnologııalardy engizý, logıstıkalyq máselelerdi jeńildetý, ónimdilikti arttyrý, sondaı-aq qarjy quraldary arqyly fermerler men óńdeýshiler úshin qolaıly jaǵdaılar jasaý.

Ulttyq maıly daqyldardy qaıta óńdeýshiler qaýymdastyǵynyń tóraǵasy ıAdyqar Ibragımovtyń aıtýynsha, Qazaqstan maı óndirý salasynda keıingi jyldary aıtarlyqtaı ósimge ıe bolyp, eksporttyń geografııasyn keńeıtken.

– Basty maqsatymyz – 2028 jyly maı jáne toń maı ónimderiniń eksportyn 1 mlrd AQSh dollaryna jetkizý. Ótken maýsymda 837 mln dollarlyq ónim eksporttap, el tarıhyndaǵy eń joǵary kórsetkishke jettik, - dedi ol.

Ibragımov Jol kartasynda logıstıka, halyqaralyq standarttarǵa sáıkestik, fermerlerdi qoldaý jáne óńdeý qýattaryn arttyrý boıynsha birneshe sharalar qarastyrylǵanyn atap ótti.

Sondaı-aq kúnbaǵys egisin 850 myń gektarǵa deıin ulǵaıtý esebinen shıkizat bazasy keńeıetini aıtyldy.

Al Eýropalyq Odaqtyń Qazaqstandaǵy Delegatsııa ókilderi qujattyń salany jańa deńgeıge shyǵaratynyn jetkizdi.

– Bul Jol kartasy – Qazaqstannyń agroóńdeý salasy úshin mańyzdy kezeń. Ol eksportty ulǵaıtýǵa, logıstıkany jaqsartýǵa jáne halyqaralyq talaptarǵa saı ónim óndirýge jaǵdaı jasaıdy, - dedi delegatsııa basshysynyń orynbasary Iohannes Baýer.

Búginde Qazaqstan maı ónimderin álemniń 20-dan astam eline eksporttaıdy. Eýropalyq Odaq kúnbaǵys kúnjarasynyń ımporty boıynsha Qazaqstandy TOP-3 jetkizýshiniń biri retinde atap ótedi.

Aıta keteıik, buǵan deıin Ózbekstanda qazaqstandyq bıdaı men maı ónimderine suranys artyp kele jatqanyn jazǵan edik.