Qazaqstan Máskeý men Sankt-Peterbýrgke baratyn poıyzdardy ne sebepti toqtatty

ASTANA. QazAqparat - Búgin Astanada ótken baspasóz máslıxatynda QR Investıtsııalar jáne damý mınıstrligi kólik komıtetiniń tóraǵasy Áset Asaýbaev Máskeý men Sankt-Peterbýrgke baratyn poıyzdardyń ne sebepti toqtatylǵanyn túsindirdi, dep xabarlaıdy «QazAqparat» HAA tilshisi.

"Atalǵan baǵyttaǵy poıyzdardy toqtatýdyń sebebi - temirjol men áýe qatynasy baǵasynyń birdeı bolýy. (Ushaqtyń bıleti, shamamen 60 myń teńge bolsa, temirjoldyń qyzmeti - 52 myń teńge (platskart), 72 myń teńge (kýpe). Alaıda negizgi sebebi - jolaýshylardyń az bolýy. Ondaı jaǵdaıda qalǵan shyǵyndy tasymaldaýshynyń ózi óteıdi. Máselen, osy jaqtan shyqqan poıyzben Máskeýge barǵan adam az boldy, Reseıdiń ózinde kóp minbeıdi. Barlyq vagondardyń tek 40 paıyzynda ǵana adam boldy. Suranys jyldan-jylǵa tómendep keldi. Aqyr sońynda ol poıyzdardy toqtatýǵa májbúr boldyq", - deıdi Á.Asaýbaev.

Onyń aıtýynsha, Máskeý men Sankt-Peterbýrg qalasyna baratyn poıyzdar toqtatylsa da, Qazaqstan azamattary Reseı shekarasyndaǵy qalalarǵa deıin baryp, sol jerden Máskeýge baratyn poıyzǵa mine alady. Ol úshin eki jaqtyń kestesi úndestirildi. 

Aıta keteıik, aǵymdaǵy jyly 72/72 Astana - Máskeý, 107/108 Qaraǵandy - Kıev jáne 39/40 Astana - Sankt-Peterbýrg baǵytyndaǵy poıyzdar toqtatylǵan bolatyn.