Qazaqstan Máskeý bırjasynyń KASE-degi 13 paıyzyn qaıta satyp ala ma – Ulttyq bank jaýaby

ASTANA. KAZINFORM – Parlament palatalarynyń birlesken otyrysynan keıin BAQ ókilderiniń suraǵyna jaýap bergen Ulttyq bank tóraǵasy Tımýr Súleımenov KASE-degi (Qazaqstan qor bırjasyndaǵy) Máskeý bırjasynyń úlesin qaıta satyp alý máselesine pikir bildirdi.

«KASE-niń 47 paıyzy Ulttyq qorǵa tıesili. Qalǵan jeke menshik qarjy ınstıtýttarynyń ıeliginde. Sondyqtan sheshimdi jalǵyz qabyldamaımyz. KASE qazir kelissóz júrgizip jatyr. Onyń ishinde MOEX-pen de (Máskeý bırjasy), kez kelgen jol qarastyrylyp jatyr. Bálkim satyp alý sharasy da bolýy múmkin», - dedi Ulttyq bank basshysy. 

Sondaı-aq, ol Reseı rýblin Qazaqstanda konvertatsııalaýǵa shekteý qoıylmaıtynyn málim etken edi. 

«Joq, qazirgi tańda shekteýdiń eshqandaı qajeti joq. Óıtkeni biz kórip otyrǵan qubylys tek 1-2 protsent kóleminde. Menińshe 1-2 protsent úshin shekteý jasaýdyń eshqandaı qajeti joq», - dedi Tımýr Súleımenov.