Qazaqstan mashına jasaý baǵytynda álemdik brendtermen yntymaqtastyqty jalǵastyrýy qajet - Elbasy
Qazaqstannyń mashına jasaý kesheni eldiń ındýstrııalyq-ınnovatsııalyq damýynyń lokomotıvi bolýy tıis ekenin qadap aıtty. Prezıdenttiń forýmǵa arnaǵan sózin QR Premer-Mınıstriniń birinshi orynbasary Baqytjan Saǵyntaev oqyp berdi.
«Qazaqstan mashına jasaýshylary forýmy memleket pen bıznes jáne ǵylym arasynda tıimdi dıalog alańyna aınaldy. Elimiz qaıta óńdeýde joǵary deńgeıdegi óndiristiń ónimin shyǵarý arqyly turaqty jáne úılestirilgen ekonomıkany qurý baǵytyn tańdady. Biz Eýrazııalyq ekonomıkalyq odaq pen DSU-ǵa kire otyryp, álemdik naryqtarǵa qoljetimdilikti arttyryp, ózimizdiń naryqtarymyz da ashtyq. Qazaqstannyń mashına jasaý kesheni ekonomıkalyq túrlendirýdiń jáne eldiń ındýstrııalyq-ınnovatsııalyq damýynyń lokomotıvi bolýy tıis», - dedi Elbasy.
Prezıdent bes jylda saladaǵy jumys istep turǵan kásiporyndar artqandyǵyn, olardyń arasynda mobıldi burǵylaý kesheni, elektrovozdar, júk jáne jolaýshylar vagondary, lokomotıvter óndiristeri, sondaı-aq basqa da kóptegen zaýyttar iske qosylǵanyn eske salyp ótti.
«Indýstrııalandyrý kartasy aıasyndaǵy birinshi kezeńinde atalǵan baǵytta 212 mlrd. teńgeniń 74 jobasy iske qosylyp, 9 myńnan astam turaqty jumys oryndary quryldy. Salaǵa ınvestıtsııalardy tartý boıynsha júıelik jumystardy jáne mashına jasaý baǵytynda álemdik brendtermen yntymaqtastyqty keńeıtýdi jalǵastyrý qajet», - delingen Elbasynyń forým qatysýshylaryna arnalǵan sózinde.
