Qazaqstan Marko Polo týraly álemdik fılm túsirip jatyr (FOTO)
Ǵylymı-tanymdyq fılmdi barynsha mol ári qundy materıaldarmen tolyqtyrý úshin Astanaǵa sheteldik ǵalymdar, naqtyraq aıtsaq, Italııa, Qytaı, Reseı elderiniń ǵalymdary kelip, «Marko Polo saıahatynyń murasy» atty dóńgelek ústelde ǵylymı jańalyqtaryn jarııa etti.
«Dóńgelek ústel halyqaralyq deńgeıdegi shara ekenin atap ótken jón. Italııa, Qytaı, Reseı elderiniń ǵalymdarymen qatar, Marko Polony zerttegen Qazaqstannyń barlyq ǵalymdaryn túgel shaqyrdyq. Dóńgelek ústeldiń basty maqsaty - saıahatshy týraly ǵylymı-tanymdyń fılmge barynsha mol materıal jınaý»,-deıdi A.Hazbýlatov.
Jalpy, Marko Polo kim? Marko Polo - sonaý HІІІ ǵasyrda ómir súrgen venetsııalyq saýdager. Jáne de Venetsııadan Qytaıǵa deıin jol júrip, álemniń san alýandyǵy týraly kitap jazǵan Eýropanyń alǵashqy saıahatshysy da Marko Polo dep sanalady.
«Marko Polo - óte erekshe tulǵa. Marko Polo - ańyz adam, ómirde bolmaǵan, oıdan shyqqan adam degen málimdemeler bar. Qytaı tilindegi jazbalarda Marko Polonyń esimi múlde kezdespeıdi deıtinder bar, biraq, onyń aty-jóni qytaı tilinde qıyn jazylǵan soń, onyń aty ózgerýi múmkin. Geografııa ǵylymdarynyń doktory, L.N.Gýmılev atyndaǵy Eýrazııa Ulttyq ýnıversıtetiniń Týrızm jáne geografııa ǵylymı-zertteý ınstıtýtynyń dırektory Adaı Sákenulynyń qolynda Marko Polonyń Qytaıdy 17 jyl boıy saıahattaǵanyn dáleldeıtin qujattar bar. Eger Marko Polo mıf bolsa, Qytaı onyń esiminen brend jasamaıtyn edi», - deıdi bul máselege toqtalǵan A.Hazbýlatov.
Al, qazaq mádenıeti ǵylymı-zertteý ınstıtýty Marko Polonyń murasyna nege sonsha qyzyǵyp, ol týraly álemdik deńgeıde fılm túsirýge nege sonsha ynta týdyryp otyr, degen suraǵymyzǵa ınstıtýt dırektory: «Fılm túsirer kezde ǵalymdarmen bir kelissózge kelip, osy ýaqytqa deıin zerttelgen materıaldardy jınaqtaı kele, Marko Polo ańyz emes ekenin dáleldegimiz keledi. Jáne biz úshin eń mańyzdysy - onyń Ortalyq Azııa jerimen júrip ótkenin álemge pash etý. Marko Polonyń eńbekterinde qymyz ben dombyra týraly tamasha áńgimeler jazylǵan. Sondyqtan, onyń Ortalyq Azııada ótken marshrýtyn kórsetsek, ásirese, Qazaqstan aýmaǵynan júrgenin kórsetsek, óte qyzyq bolar edi. Bizdiń boljamymyzsha, ol Almaty oblysynyń taýlaryna aıaq tiregen. Onyń ákesi men aǵasy dál osylaı júrip ótkenin bilemiz. Qazaqstan Marko Polony nege zerttep jatyr desek, Marko Polo sııaqty ataqty saıahatshy Qazaqstanǵa da saıahattaǵanyn álemge kórsetýimiz kerek» dep jaýap berdi.
«2016 jyly fılmniń birinshi serııasyn, 2017 jyly ekinshi serııasyn túsiremiz. Joba otandyq kınematografııany, atap aıtqanda, ǵylymı-tanymdyq janrdaǵy qazaq kınolaryn damytýǵa baǵyttalǵan. Qazirgi tańda ınstıtýt fılmdi álemdik prokatqa shyǵarý úshin Sankt-Peterbordaǵy «SevZapKıno» kınostýdııasymen kelisimge qol qoıdyq, sondaı-aq, Italııanyń eń iri teleradıokompanııasy - «RAI» AQ-men kelissózder júrgizýdemiz », - dep málim etti A.Hazbýlatov.
