Qazaqstan mamandary Izraıldiń aldyńǵy qatarly medıtsına ortalyqtarynda biliktiligin arttyrady
ASTANA. QazAqparat - Búgin Qazaqstan-Izraıl saýda-ekonomıkalyq yntymaqtastyq jónindegi komıssııasynyń 7-shi otyrysy ótti, dep habarlaıdy QazAqparat.
Qazaqstan tarapynan Qazaqtan Respýblıkasynyń Qarjy mınıstri Baqyt Sultanov, Izraıl tarapynan Izraıl Memleketiniń Qorshaǵan ortany qorǵaý jáne Ierýsalım men dıaspora isteri jónindegi mınıstri Zeev Elkın basqarýmen ótken otyrys aıasynda eki el arasynda saýda, kásipkerlik pen ınvestıtsııa, aýyl sharýashylyǵy, densaýlyq saqtaý, aqparattyq-kommýnıkatsııalyq tehnologııalar salasyndaǵy ekijaqty yntymaqtastyqtyń ózekti jáne perspektıvaly baǵyttary talqylandy.
Sondaı-aq Izraıl Memleketiniń Premer-Mınıstri B.Netanıahýdyń Qazaqstan Respýblıkasyna sapary barysynda ekijaqty qujattardy qol qoıýǵa daıyndaý máseleleri pysyqtaldy. Densaýlyq saqtaý salasyndaǵy yntymaqtastyqty jandandyrý, atap aıtqanda qazaqstandyq mamandardyń Izraıldiń aldyńǵy qatardaǵy medıtsına ortalyqtarynda biliktiligin arttyrý, jáne Izraıl mamandarynyń qatysýymen sheberlik sabaqtaryn ótkizý ýaǵdalastyǵyna da jetkizildi.
Munan bólek, Izraıl tarapy aýyl sharýashylyǵy salasyndaǵy yntymaqtastyqty damytýǵa qyzyǵýshylyq tanytty. Atap aıtqanda, «Úshqońyr» tamshylatyp sýarý boıynsha Qazaqstan-Izraıl ortalyǵyn halyqaralyq ortalyqqa aınaldyrý, Qazaqstanda demonstratsııalyq ferma qurylysy boıynsha birikken konsortsıýmdy qurýǵa erekshe nazar aýdardy.
