Qazaqstan men Malaızııa quny 350 mıllıon dollar bolatyn jobalar boıynsha kelisimge qol qoıdy
ASTANA. KAZINFORM – Elordada Úkimet basshysy Oljas Bektenov pen Malaızııa Premer-Mınıstri Anýar Ibragım eki eldiń bıznes-qoǵamdastyqtary men ǵylymı toptary ókilderiniń qatysýymen Qazaqstan-Malaızııa ınvestıtsııalyq dóńgelek ústelin ótkizdi.
Jıynda ekonomıkanyń basym salalaryndaǵy yntymaqtastyqty arttyrý perspektıvalary talqylandy. Qazaqstan Úkimetiniń basshysy óz kezeginde Malaızııa elimizdiń Ońtústik-Shyǵys Azııadaǵy negizgi saýda-ekonomıkalyq áriptesterdiń biri ekenin atap ótti. Bir jyl ishinde ekijaqty taýar aınalymy $150 mln-nan shamamen $245 mln-ǵa deıin óskenin tilge tıek etip, endigi maqsat ekonomıkalardyń qolda bar áleýetin ashý jáne ekijaqty saýda kórsetkishin pandemııaǵa deıingi $650 mln-nan asyrý ekenin aıtty.
«Bizdiń memleketterimizdiń arasyndaǵy tyǵyz saıası dıalog ózara seriktestiktiń berik negizin qalaıdy. Elimizdiń Prezıdenti Qasym-Jomart Toqaev pen Sizdiń keshegi kezdesýińiz ekijaqty qarym-qatynastardyń damýyndaǵy mańyzdy tarıhı kezeń boldy. Qazaqstan Úkimeti joǵary deńgeıde qabyldanǵan barlyq ýaǵdalastyqtardy iske asyrýǵa daıyn ekenin bildiredi», - dep atap ótti Oljas Bektenov.
Oljas Bektenov Qazaqstannyń Malaızııaǵa eksportty ártaraptandyrý nıeti týraly málimdep, malaızııalyq kásipkerlerdi qyzmet kórsetý, óńdeý ónerkásibi, qarjy, bilim berý, jer qoınaýyn paıdalaný, aýyl sharýashylyǵy jáne qurylys salalaryndaǵy seriktestigin nyǵaıtýdyń jańa múmkindikterin birlesip zerdeleýge shaqyrdy. Búginde Qazaqstanda malaızııalyq kapıtaldyń qatysýymen 48 kompanııa jumys isteıdi. Jalpy somasy $410 mln-nan astam 17 birlesken ınvestıtsııalyq joba iske asyrylýda.
Óz kezeginde Malaızııa Premer-Mınıstri Anýar Ibragım memleketaralyq is-qımyldyń oń dınamıkasyn atap ótti. Sońǵy jyldary eki el arasyndaǵy taýar aınalymynyń ósimi 30%-dan asty. Malaızııa Qazaqstanmen týrızm, bilim berý, energetıka salalarynda, sondaı-aq qazaqstandyq halal ónimderdi jetkizý salasynda yntymaqtastyqty nyǵaıtýǵa nıetti. Budan basqa, áleýeti basym baǵyttar boıynsha birlesken jobalar sanyn kóbeıtý qajettigi atap ótildi.
Dóńgelek ústelge qatysýshylarǵa Qazaqstanda elimizdiń ınvestıtsııalyq tartymdylyǵyn arttyrý jónindegi júıeli sharalardyń iske asyrylýy týraly aıtyldy. Investorlarǵa salyq jáne kedendik jeńildikter beriledi, konsaltıngtik jáne ınfraqurylymdyq qoldaý kórsetilýde.
Dóńgelek ústel aıasynda qazaqstandyq jáne malaızııalyq bıznes ókilderi naqty kelissózder júrgizdi. Malaızııa Parlamentiniń senatory, Ulttyq kásipkerler jáne ındýstrııa palatasynyń (NCCIM) prezıdenti Loý Kıan Chýan Qazaqstannyń Malaızııanyń Ortalyq Azııa aımaǵyndaǵy mańyzdy ári eń úlken strategııalyq seriktesi ekenin atap ótti.
Dóńgelek ústel alańdarynda ınvestıtsııalyq baılanystardy tereńdetý jáne jańa naryqtardy birlesip ıgerý týraly ýaǵdalastyqqa qol jetkizildi jáne jalpy somasy $350 mln asatyn kelisimder men memorandýmdarǵa qol qoıyldy. Islam qarjysyn jáne saýdany damytý, sondaı-aq azyq-túlik ónerkásibi, taý-ken salalaryna ınvestıtsııalar tartý, altyn óńdeý jáne transformator men avtomobıl maıyn birlesip óndirý salalarynda yntymaqtastyq ornatý josparlanǵan.
Ýaǵdalastyqtardy júzege asyrý eki eldiń tabysty yntymaqtastyqtyǵyn keńeıtý jolyndaǵy mańyzdy qadam bolmaq.
