Qazaqstan mal sharýashylyǵy ónimin 42 elge jetkize alady

ASTANA. KAZINFORM — Mal sharýashylyǵy ónimin eksporttaý boıynsha shet elderdiń tizilimine 3 728 qazaqstandyq kásiporyn engizildi. Bul týraly Aýyl sharýashylyǵy vıtse-mınıstri Amanǵalı Berdalın málim etti.

— Bıyl soltústik-batys óńirdegi aýsyldan taza aýmaqtyń mártebesin taný úshin Dúnıejúzilik janýarlar saýlyǵy uıymyna dereknama jiberildi. Alynǵan salamattylyq mártebesi otandyq óndirýshilerdiń eksporttyq áleýetin arttyrýǵa múmkindik berdi. Osy jyly 16 veterınarııalyq sertıfıkat kelisildi jáne qol qoıyldy, bul mal sharýashylyǵy ónimderin eksporttaýǵa jol ashady. Jalpy otandyq mal sharýashylyǵy ónimin Eýropa odaǵy elderine, Ulybrıtanııa, Irak, Iran, AQSh, Kanada jáne basqa da baǵyttardy qosa alǵanda, 42 elge jetkizýge bolady, — dedi A. Berdalın Senatta veterınarııalyq qyzmet taqyrybyn talqylaýǵa arnalǵan Úkimet saǵatynda.

Onyń aıtýynsha, Qytaı Halyq Respýblıkasymen eksport boıynsha hattamalarǵa qol qoıyldy: soıylǵan iri qara mal, muzdatylǵan qus eti, salqyndatylǵan ári termııalyq óńdelgen shoshqa eti jáne qosalqy ónimderi, sondaı-aq óńdelgen qoı men eshki eti.

— Bıyl Qytaı Halyq Respýblıkasy tarapynan Qazaqstan ónimin eksporttaý múmkindigine ınspektsııa júrgizildi. Tekserý nátıjelerin kútip otyrmyz, — dedi vıtse-mınıstr.

Onyń sózine qaraǵanda, búginde shet elderdiń tizilimine 3 728 qazaqstandyq kásiporyn engizildi.

Budan buryn habarlanǵandaı, el aýmaǵynda 9,1 mln bas iri qara mal tirkeldi.