Qazaqstan mal sharýashylyǵy ónimderin Grýzııa arqyly álemdik naryqqa shyǵarmaq

20-24 sáýir aralyǵynda Grýzııada sút jáne et óndirisine arnalǵan Dala.Camp Georgia halyqaralyq forýmy ótti. Іs-sharaǵa Qazaqstan, Grýzııa, Ózbekstan, Ázirbaıjan, Qyrǵyzstan, Tájikstan jáne Túrikmenstannan 100-den astam qatysýshy jınaldy. Bes kún boıy fermerler, óńdeýshiler, ınvestorlar men sala sarapshylary mal sharýashylyǵyn damytýdyń negizgi baǵyttaryn jáne ónimniń básekege qabilettiligin arttyrý joldaryn talqylady.

Forýmnyń mańyzdy oqıǵalarynyń biri — Turan qazaqstandyq mal ósirýshiler qaýymdastyǵy, Trouw Nutrition (Nıderlandy) jáne Nutrimax (Grýzııa) arasynda ózara túsinistik týraly memorandýmǵa qol qoıylýy boldy. Qujat mal sharýashylyǵyndaǵy yntymaqtastyqty damytýǵa, onyń ishinde óndiris tıimdiligin arttyrýǵa jáne azyqtandyrý men basqarýdyń zamanaýı tásilderin engizýge baǵyttalǵan.

Kelisim aıasynda qazaqstandyq et, sút, teri, jún jáne basqa da ónim túrlerin eksporttaýǵa qoldaý kórsetý kózdelgen. Sonymen qatar taraptar jemshóp óndirisi, genetıka, veterınarııa jáne fermalardy basqarý salalarynda tehnologııa almasyp, birlesken bilim berý bastamalaryn iske asyrýdy josparlap otyr.

Forým barysynda Turan qaýymdastyǵynyń basqarma tóraǵasy Jánibek Kenjebaev pen Grýzııanyń qorshaǵan ortany qorǵaý jáne aýyl sharýashylyǵy vıtse-mınıstri Lasha Avalıanı arasynda jumys kezdesýi ótti. Kezdesý barysynda qazaqstandyq ónimderdi Grýzııa naryǵyna jetkizý jáne osy el arqyly basqa memleketterge eksporttaý, sondaı-aq Qazaqstannyń agroónerkásip keshenine grýzın ınvestıtsııalaryn tartý máseleleri talqylandy.

Jaqyn ýaqytta Grýzııanyń salalyq mınıstrligimen jeke memorandýmǵa qol qoıý josparlanyp otyr.

— Búginde Qazaqstan mal sharýashylyǵyn damytýdyń ashyq, tehnologııalyq jáne eksportqa baǵdarlanǵan jańa modelin qalyptastyryp jatyr. Forým alańynda qol jetkizilgen ýaǵdalastyqtar — bul jaı ǵana formaldylyq emes, naryqtarymyzdy ıntegratsııalaýdyń naqty qadamy. Biz bilim almasýdan birlesken jobalarǵa, dıalogtan naqty jetkizilimder men seriktestikterge baǵyttalǵan júıeli qozǵalysty kórip otyrmyz, — dedi Jánibek Kenjebaev.

Forým aıasynda qatysýshylar ratsıondardy qalyptastyrýdan bastap, azyqtandyrýdy basqarý, shyǵyndardy azaıtý jáne sharýashylyqtardyń ónimdiligin arttyrýǵa deıingi tıimdilik máselelerin taldady. Sondaı-aq NutriOpt baǵdarlamasynyń múmkindikteri men ony tájirıbede qoldaný joldaryna erekshe nazar aýdaryldy.

Qatysýshylar Kahetııa óńirindegi Nutrimax zamanaýı óndiristik kásipornyna baryp, jem óndirý tehnologııasymen, sapany baqylaý júıesimen jáne óndiristi uıymdastyrý erekshelikterimen tanysty.

Forým baǵdarlamasynda Qazaqstannan usynylǵan praktıkalyq keıster de keńinen talqylandy. Qatysýshylar sút jáne etti mal sharýashylyǵyndaǵy tájirıbelerin bólisip, sharýashylyq ekonomıkasy, basqarý tásilderi jáne bıznesti masshtabtaý modelderi týraly baıandady.

— Qazaqstan búginde tájirıbeni qabyldap qana qoımaı, halyqaralyq deńgeıde qoldanýǵa bolatyn tıimdi sheshimder usynatyn saraptama ortalyǵyna aınalyp keledi, — dep atap ótti Jánibek Kenjebaev.

Dala.Camp Georgia forýmynyń spıkerleri qatarynda Nıderlandynyń Grýzııadaǵy elshisi Melına Arakelıan, Trouw Nutrition kompanııasynyń Shyǵys Eýropa jáne Ortalyq Azııa boıynsha kommertsııalyq dırektory Roland Van Dalen, NutriOpt baǵdarlamasy boıynsha maman ıAroslav Tsıps, Nutrimax negizin qalaýshy Beka Bekaıa, kompanııanyń bas dırektory Gıorgı Chıtaıshvılı, Nutrimax Kazakhstan dırektory Revaz Lapachı, Tiar-Invest zootehnıgi Dılshod Nabıev, Unicorn Feed Limited kompanııasynyń bas dırektory Rýslan Kakenov jáne basqa da sala ókilderi boldy.

Uıymdastyrýshylardyń málimetinshe, Dala.Camp alańy óndirýshilerdi, ınvestorlardy jáne sarapshylardy biriktiretin halyqaralyq kásibı qaýymdastyqqa aınalyp keledi.

— Biz búginde tek salany talqylap qana qoımaı, onyń bolashaǵyn birge qalyptastyratyn tolyqqandy ekojúıeniń qurylyp jatqanyn kórip otyrmyz. Dala.Camp Qazaqstan sheńberinen shyǵyp, bilim, tehnologııa jáne bıznes úshin halyqaralyq platformaǵa aınalýda, — dedi Jánibek Kenjebaev.

Eske sala keteıik, 2026 jyldyń aqpan aıynyń basynda Turan mal ósirýshiler qaýymdastyǵy Býrabaıda 11 elden 250-ge jýyq delegattyń basyn qosqan Dala.Camp halyqaralyq forýmyn ótkizgen bolatyn.

Ekojúıeni damytýdyń kelesi kezeńi — Dala.Camp ulttyq mal sharýashylyǵy ekspedıtsııasy bolmaq. 2026 jylǵy 1 mamyrda Astanada bastalatyn joba elimizdiń keminde 10 óńirin qamtyp, 40-qa jýyq qatysýshyny biriktiredi. Realıtı-shoý elementteri bar bul dalalyq bilim berý medıa jobasy aıasynda qatysýshylar 6000 shaqyrymnan astam jol júrip, jetekshi sharýashylyqtardy aralap, praktıkalyq tájirıbe jınaqtaıdy.

Ekspedıtsııa Dala.Camp bastamalarynyń logıkalyq jalǵasy bolyp, mal sharýashylyǵyn damytýǵa, adamı kapıtaldy nyǵaıtýǵa jáne salany Qazaqstan ekonomıkasynyń negizgi ósim núkteleriniń birine aınaldyrýǵa baǵyttalǵan.

Aıta keteıik, buǵan deıin Qazaqstan Grýzııaǵa eksport kólemin arttyratyny habarlandy.