Qazaqstan mal sharýashylyǵy men agrotehnologııa salasynda Argentına jáne Brazılııamen áriptestikti nyǵaıtty
ASTANA.KAZINFORM - Qazaqstan agrarlyq saladaǵy halyqaralyq yntymaqtastyqty júıeli túrde keńeıtip, mal sharýashylyǵy boıynsha álemdik jetekshi quzyret ortalyqtarymen uzaq merzimdi áriptestik ornatyp otyr. Osy rette Aýyl sharýashylyǵy vıtse-mınıstri Amanǵalı Berdalın Brazılııa, Argentına elderine jumys saparymen bardy.
Basty maqsat – genetıka, selektsııa salalarynda strategııalyq ózara is-qımyldy damytý, joǵary ónimdi asyl tuqymdy mal ımportyn jolǵa qoıý, sondaı-aq ozyq agrotehnologııalardy engizý.
Brazılııada qazaqstandyq delegatsııa Latyn Amerıkasyndaǵy eń iri «Agrishow 2026» agroónerkásiptik kórmesine qatysty.
Іs-shara barysynda «Angýs» jáne «Gereford» tuqymdaryn ósirý tájirıbesimen almasý, embrıondardy transplantatsııalaý sekildi bıotehnologııalardy damytý, sondaı-aq Qazaqstanǵa asyl tuqymdy maldy tikeleı jetkizý tetikterin pysyqtaý máseleleri talqylandy.
Vıtse-mınıstr Brazılııa Federatıvtik Respýblıkasynyń Aýyl sharýashylyǵy, mal sharýashylyǵy jáne azyq-túlikpen qamtamasyz etý mınıstrligi ókilderimen, sondaı-aq Zebý tuqymyn ósirýshiler qaýymdastyǵymen kezdesý ótkizdi.
Aýyl sharýashylyǵy málimetinshe, ótken jyldyń qorytyndysy boıynsha Qazaqstan men Brazılııa arasyndaǵy agroónerkásiptik keshen salasyndaǵy taýar aınalymy 10%-ǵa ósip, 89,5 mln AQSh dollaryna jetti. Taraptar bul saladaǵy yntymaqtastyq áleýeti áldeqaıda joǵary ekenin atap ótip, ózara saýda kólemin ulǵaıtý baǵytyndaǵy birlesken jumysty jandandyrýǵa kelisti.
Delegatsııa músheleri «Halim Laboratory» jáne «Agropecuaria 3G» kompanııalarynyń qyzmetimen tanysty. Bul kásiporyndar sıyr etin óndirýge arnalǵan «Senepol» jáne «Brangus» tuqymdarynyń genetıkasymen aınalysady.
Argentına astanasy Býenos-Aıres qalasynda eldiń Aýyl sharýashylyǵy, mal sharýashylyǵy jáne balyq sharýashylyǵy mınıstrliginiń basshylyǵymen, sondaı-aq iskerlik jáne salalyq qaýymdastyq ókilderimen kelissózder ótti.
Kezdesý barysynda ekijaqty yntymaqtastyqty keńeıtý, tehnologııalar transferti, ǵylymı baılanystardy damytý jáne birlesken ınvestıtsııalyq jobalardy iske qosý máseleleri talqylandy.
Vıtse-mınıstr mal sharýashylyǵyn damytý memlekettik agrarlyq saıasattyń basym baǵyttarynyń biri ekenin atap ótti. Osyǵan baılanysty salany damytýdyń keshendi jospary ázirlengen. Qujatta asyl tuqymdy mal satyp alýǵa jyldyq 6% mólsherlememen jeńildetilgen nesıe berý, sondaı-aq ónimdilikti arttyrý men salany tehnologııalyq jańǵyrtýǵa baǵyttalǵan ınvestıtsııalyq sýbsıdııalar qarastyrylǵan.
– Argentına – mal sharýashylyǵy boıynsha álemdik kóshbasshylardyń biri. Biz úshin genetıka men selektsııa salasyndaǵy ozyq tájirıbelerdi transfertteý, sondaı-aq salanyń sapaly ósimin qamtamasyz etetin birlesken jobalardy júzege asyrý mańyzdy, - dedi Amanǵalı Berdalın.
Sondaı-aq Argentınanyń Ulttyq aýyl sharýashylyǵy tehnologııalary ınstıtýtymen (INTA) ózara is-qımylǵa erekshe nazar aýdarylyp, ony birlesken ǵylymı-tehnologııalyq bastamalardy praktıkalyq iske asyrý deńgeıine kóterý josparlanyp otyr.
Delegatsııa Býenos-Aıres provıntsııasyndaǵy ozyq mal sharýashylyǵy sharýashylyqtarynyń jumysymen de tanysty. Onda asyl tuqymdy esepke alý men selektsııanyń zamanaýı júıeleri, joǵary ónimdi tuqymdardy, sonyń ishinde «Angýs» tuqymyn ósirýdiń úzdik tájirıbeleri tanystyryldy.
Aıta keteıik, Qazaqstan mal sharýashylyǵy ónimderin Grýzııa arqyly álemdik naryqqa shyǵarmaq.
