Qazaqstan mal aýrýyna qarsy vaktsınalaryn Mońǵolııaǵa jetkizýge múddeli
ASTANA. KAZINFORM — Qazaqstan mal aýrýyna qarsy vaktsınalaryn Mońǵolııaǵa jetkizýge múddeli. Bul týraly Aqordada Mońǵolııa Prezıdenti Ýhnaagıın Hýrelsúhpen kelissózderden keıingi birlesken málimdeme barysynda Memleket basshysy Qasym-Jomart Toqaev aıtty.
— Eki el de tabıǵı baılyǵy mol memleketter. Taý-ken salasynda, sonyń ishinde geologııalyq barlaý jáne jer qoınaýyn ıgerý isinde Qazaqstannyń tájirıbesi mol. Qos tarap osy baǵytta birlesip, kúsh jumyldyrýǵa daıyn. Elderimiz aýyl sharýashylyǵyna, ásirese mal sharýashylyǵyna aıryqsha mán beredi. Qazirgi zamanda mal ónimderiniń halyqaralyq standarttarǵa saı ári qaýipsiz bolýy asa mańyzdy. Qazaqstanda mal aýrýyna qarsy tıimdi vaktsına óndirisi jolǵa qoıylǵan. Biz elimizdiń vaktsınalaryn Mońǵolııaǵa jetkizý, bolashaqta birlesken óndiris oryndaryn ashý múmkindigin qarastyrýǵa múddelimiz, — dedi Qasym-Jomart Toqaev.
Sondaı-aq Prezıdent Qazaqstannyń Mońǵolııanyń jerdi ǵaryshtan baqylaıtyn júıe qurý bastamasyna qolǵabys etýge daıyn ekenin basa aıtty.
— Osy salaǵa qajetti, bilikti mamandardy daıarlaýǵa bolady. Qazaqstan tsıfrlyq damý máselesine aıryqsha nazar aýdarady. Bul elimizdiń bolashaǵyn jahandyq básekedegi ornyn aıqyndaıtyn strategııalyq sala. Búgin Hýrelsúh myrza Álem AІ halyqaralyq ortalyǵyna jáne Aqyldy qalany basqarý ortalyǵyna barady. Jalpy, tsıfrlandyrý salasyndaǵy ózara yntymaqtastyqty damytýǵa eki tarap ta múddeli, — dedi Memleket basshysy.
Buǵan deıin Qasym-Jomart Toqaev Aqordada Mońǵolııa Prezıdentin qarsy alǵanyn jazǵan edik.
