Qazaqstan-Makedon ózara is-qımylynyń jańa baǵyttary aıqyndaldy
ASTANA. QazAqparat - Astanada syrtqy saıası vedomstvo basshylary orynbasarlarynyń deńgeıinde Qazaqstan-Makedon saıası konsýltatsııalary ótti, dep habarlaıdy QazAqparat SІM baspasóz qyzmetine silteme jasap.
Qazaqstan Respýblıkasy Syrtqy ister mınıstriniń orynbasary Roman Vasılenko jáne onyń makedondyq áriptesi Andreı Jernovskıı ekonomıkalyq dıplomatııa men halyqaralyq arenadaǵy ózara is-qımylǵa basymdyq bere otyryp, kópjaqty yntymaqtastyqty tereńdetý jáne saıası saladaǵy áriptestiktiń ózekti máselelerin talqylady.
Kezdesý barysynda taraptar BUU Qaýipsizdik keńesiniń turaqty emes múshesi retindegi Qazaqstan qyzmetiniń ózekti máseleleri, MAGATE alańyndaǵy ózara is-qımyl, Sırııadaǵy ahýaldy retteý jónindegi Astana protsesi, Ortalyq Azııa men Balkan óńiri arasyndaǵy perspektıvalyq ózara is-qımyldar boıynsha pikir almasty.
Taraptar Almatyda Makedonııa qurmetti konsýldyǵynyń ashylýyn joǵary baǵalady.
«Bizdiń memleketterimiz arasynda qandaı da bir saıası jáne ózge de sıpattaǵy kelispeýshilik joq - bul óz kezeginde ekijaqty saýda-ekonomıkalyq jáne ınvestıtsııalyq yntymaqtastyqty jandandyrý men keńeıtýge qolaıly alǵysharttar qalyptastyrady», - dedi R. Vasılenko.
