Qazaqstan MAGATE elderiniń egemendi teńdigin qalpyna keltirýge tyrysýda
Venada Atom energııasy jónindegi halyqaralyq agenttigi (AEHA/MAGATE) Bas konferentsııasynyń 67-sessııasy ótti. Onyń sheńberinde "AEHA-daǵy múshe-memleketterdiń egemendi teńdigin qalpyna keltirý týraly" Qazaqstan usynǵan qarar basym kópshilik daýyspen (99-2-16) qabyldandy. QazAqparat bul týraly QR Syrtqy ister mınıstrligine silteme jasap habarlaıdy.
Qarardy Qazaqstan Respýblıkasy Syrtqy ister mınıstriniń birinshi orynbasary Qaırat Omarov tanystyrdy jáne ony AEHA-nyń barlyq óńirlik toptarynan 99 múshe-memleket pen 56 teń avtor qoldady.
Anyqtama: qazaqstandyq qarardyń negizgi teń avtorlary: Eýropalyq odaqtyń barlyq elderi, AQSh, Ulybrıtanııa, Qytaı, Ázerbaıjan, Bahreın, Kanada, Meksıka, Kolýmbııa, Ekvador, Ýrýgvaı, Sıngapýr, Japonııa, Nepal, Túrkııa jáne taǵy da basqa memleketter.
Málim etilgendeı, Qazaqstan bastamashylyq etken qarar múshe-memleketterdiń AEHA-daǵy qyzmetine qatysty neǵurlym ádil jáne demokratııaly tásilderdi qamtamasyz etýine negiz beredi.
«Qazaqstan agenttikte egemendi teńdikti qalpyna keltirý boıynsha kúsh-jiger sheńberinde AEHA tarıhynda alǵash ret óńirlik toptarǵa kirmeıtin 17 memlekettiń tizimin daıyndady. Bul tizim agenttiktiń 2023 jylǵy 10 tamyzdaǵy resmı qujatymen bekitildi jáne Slovenııanyń tóraǵalyǵymen qurylyp jatqan «Dostar toby» (Group of Friends of Arealess Member States) sheńberinde odan ári jumysty qurýǵa negiz retinde Bas konferentsııanyń qararyna engizildi», – delingen SІM málimetinde.
Qabyldanǵan qarar múshe-memleketterdiń óńirlik toptarda, negizgi dırektıvalyq organdarda, sondaı-aq agenttiktiń tıisti konsýltatıvtik protsesterinde teń ókildik etýiniń burynnan kele jatqan problemasyn qaıta kóterýge alǵashqy praktıkalyq qadam bolǵany atap ótilýde.
