Qazaqstan MAGATE alańynda ıadrolyq qaýipsizdik boıynsha Ulttyq baıandamasyn usyndy
ASTANA. KAZINFORM — Qazaqstan Halyqaralyq atom energııasy agenttiginiń Vena qalasynda ótken ıadrolyq qaýipsizdik jónindegi 10-shy sholý keńesinde Ulttyq baıandamasyn tanystyrdy, dep habarlaıdy QR Atom energııasy jónindegi agenttiktiń baspasóz qyzmeti.
2026 jylǵy 13–24 sáýir aralyǵynda Halyqaralyq atom energııasy agenttigi (MAGATE) alańynda Vena qalasynda ıAdrolyq qaýipsizdik týraly konventsııa sheńberinde mindettemelerdiń oryndalýyn qaraý jónindegi Ýaǵdalasýshy taraptardyń 10-shy keńesi ótip jatyr.
Atalǵan keńeste Qazaqstan delegatsııasyn QR Atom energııasy agenttiginiń Atomdyq qadaǵalaý jáne baqylaý komıtetiniń tóraǵasy Darhan Alıaqparov tanystyrady.
2026 jylǵy 13 sáýirde qazaqstandyq tarap ıAdrolyq qaýipsizdik týraly konventsııa aıasyndaǵy mindettemelerdi oryndaý sheńberinde daıyndalǵan 5-shi Ulttyq baıandamany usyndy.
Baıandamada ulttyq ıadrolyq ınfraqurylymnyń qazirgi jaǵdaıy men damý perspektıvalary, sondaı-aq ıadrolyq jáne radıatsııalyq qaýipsizdiktiń joǵary deńgeıin qamtamasyz etý boıynsha qabyldanyp jatqan sharalar týraly ózekti aqparat usynyldy. Onda atom energetıkasyn damytý máselesine erekshe nazar aýdaryldy.
Qazaqstanda eki atom elektr stantsııasyn salý josparlanǵan. Búgingi tańda Qazaqstandaǵy alǵashqy AES qurylysy boıynsha halyqaralyq konsortsıýmnyń kóshbasshysy retinde reseılik Rosatom memlekettik korporatsııasy aıqyndaldy.
Memlekettik retteý júıesin jetildirý boıynsha atqarylǵan jumystardyń nátıjeleri de erekshe atap ótildi. Atap aıtqanda, QR Atom energııasy agenttigi men atom energııasyn paıdalaný salasyndaǵy táýelsiz baqylaýdy qamtamasyz etetin Atomdyq qadaǵalaý jáne baqylaý komıtetiniń qurylǵany kórsetildi.
— Qazaqstan MAGATE talaptaryn qosa alǵanda, halyqaralyq standarttar men ozyq tájirıbelerdi engizýge baǵyttalǵan. Keńeske qatysý aıasynda qazaqstandyq tarap ashyqtyq, halyqaralyq yntymaqtastyq jáne ıadrolyq qaýipsizdik deńgeıin turaqty arttyrý qaǵıdattaryna beıildiligin rastady. Ulttyq baıandamany usyný Qazaqstannnyń ıadrolyq ınfraqurylymdy damytý jáne halyqaralyq mindettemelerge sáıkes retteý júıesin nyǵaıtý baǵytyndaǵy eleýli ilgerileýin kórsetti, — dep túıindedi agenttiktiń baspasóz qyzmeti.
Budan buryn Erlan Qoshanov Qazaqstan atom energetıkasy dáýirine qadam basyp otyrǵanyn aıtty.
