Qazaqstan MAEK-tegi apat saldarynan munaı óndirý kólemin qysqartady
«Iá, jyl sońyna deıin munaı óndirýge qatysty josparly kólemdi qysqarttyq. Shamamen 90,5 mln tonna munaı óndirýimiz qajet bolatyn. Qazirgi ýaqytta MAEK-tegi apattan bólek ken oryndarynda josparly jáne jospardan tys jóndeý jumystarynyń aýqymdy kólemi boldy. Munan bólek, jóndeý jumystarynyń qosymsha kólemimen baılanysty másele týyndady», - dedi mınıstr Úkimet otyrysynan keıin BAQ ókilderiniń saýalyna oraı.
Onyń atap ótýinshe, qazirgi ýaqytta elektr energııasyndaǵy shekteýlerge baılanysty munaı kúnine 12 myń tonnaǵa kem óndirilip jatyr.
«Elektr energııasyn jetkizýdegi shekteýlerge baılanysty táýlik ishindegi munaı óndirý kólemi tómendedi. Shamamen 1,5-2 mln tonnaǵa. Jyl sońyna deıin munaı óndirý kólemi boıynsha boljamdy tómendetetin shyǵarmyz. Qazirgi ýaqyttaǵy josparymyzǵa oraı jyl qorytyndysynda munaı óndirý boljamy 89,4 mln tonna bolmaq. Dınamıkany qaraımyz. Óıtkeni, ken oryndarynda jóndeý jumystary jalǵasýda», - dedi Almasadam Sátqalıev.
