Qazaqstan Madrıdtegi «FITUR» halyqaralyq týrıstik kórmesine qatysady
ASTANA. 16 qańtar. QazAqparat - Qazaqstannyń múmkindikteri Madrıdtegi «FITUR» halyqaralyq týrıstik kórmesinde kórsetiledi. Bul týraly QR Indýstrııa jáne jańa tehnologııalar mınıstrligi Týrızm ındýstrııasy komıtetiniń baspasóz qyzmeti habarlady.
«2014 jyldyń 22-26 qańtarda Madrıdte osy jyldyń alǵashqy iri dúnıejúzilik týrıstik is-sharasy bolyp tabylatyn «FITUR» 34-halyqaralyq týrıstik kórmesiniń ashylýy bolady. Kórmede týrızm salasynyń ár túrli jetistikteri kórsetiledi. Olar: sońǵy úrdister, jańa taýarlar men qyzmet kórsetýler, oqýlar, trenıngter, keńester, tájirıbe almasýlar, logıstıkalyq kompanııalar, demalys pen mádenıet» delingen habarlamada.
Kórmege qatysý jáne alańdy jabdyqtaý QR IJTM Týrızm ındýstrııasy komıtetiniń esebinen júrgiziledi. Kórmege kelýshiler 5 kún boıy IFEMA kórme kesheniniń zalynda ornalasqan Qazaqstan ekspozıtsııalarymen tanysa alady. Kórme sheńberinde elimizdiń týrıstik múmkindikterin Astana, Almaty qalalarynyń, Almaty, Jambyl, Mańǵystaý jáne Ońtústik Qazaqstan oblysynyń atynan ókildik toptary kórsetedi. Qazaqstandyq ókildik toptarynyń quramynda tanymal ulttyq zerger Álibek Berik jáne Q.Baıjanov atyndaǵy «Aqqý» kontserttik birlestikteri bar.
QR IJTM Týrızm ındýstrııasy komıtetiniń tóraǵasy Marat Iǵalıevtiń aıtýynsha, «FITUR» jobasyna Qazaqstannyń qatysýy - elimizge týrısterdi tartý maqsatyndaǵy, Qazaqstannyń týrıstik ımıdjin qalyptastyrý boıynsha atqarylyp jatqan memlekettiń úlken jumystarynyń bir bóligi ǵana. «Qazaqstan Respýblıkasy Indýstrııa jáne jańa tehnologııalar mınıstrligi Týrızm ındýstrııasy komıteti Birikken ulttyq stendtiń shoǵyrlandyrýshysy retinde týrızm salasynda iskerlik baılanys ornatý jáne elimizdiń týrıstik múmkindigin tanystyrýǵa bolatyn dástúrli kórmege qatysty», - deıdi ol.
Aıta ketý kerek, 2013 jyly «FITUR» kórmesine 167 elden 9 myńǵa jýyq kompanııa qatysqan. Ony 100 myńnan astam adam tamashalaǵan.
