Qazaqstan mádenıetiniń jetistikteri búkil álemde moıyndalýda - sarapshy O. Horata

ASTANA. QazAqparat - Ankaranyń «Hajettepe» ýnıversıtetinde Qazaqstannyń Túrkııadaǵy Elshiliginiń qoldaýymen «Qazaqstan jáne Qazaq handyǵynyń 550-jyldyǵy» taqyrybynda ǵylymı-tájirıbelik konferentsııa ótti.

Sharaǵa «Hajetepe» ýnıversıtetiniń rektory Mýrat Týnjer, QR-nyń TR-daǵy Elshisi Janseıit Túımebaev, Q.A. ıAssaýı atyndaǵy Qazaq-Túrik halyqaralyq ýnıversıtetiniń Qamqorshylyq keńesiniń tóraǵasy Osman Horata, Túrki akademııasynyń prezıdenti Darhan Qydyraly, Túrkitildes memleketteri Aqsaqaldary keńesiniń múshesi jáne QR Parlamenti Senatynyń burynǵy depýtaty Ádil Ahmetov, Ankara dıplomatııalyq korpýsynyń ókilderi, Túrkııanyń áıgili akademııalyq jáne qoǵamdyq-saıası qaıratkerleri qatysty.

J. Túımebaev Qazaq handyǵynyń 550-jyldyǵyna arnalǵan is-sharany uıymdastyrǵany úshin «Hajetepe» ýnıversıtetiniń basshylyǵyna alǵysyn bildirdi. Ol Elbasy Nursultan Nazarbaevtyń «Nurly jol - bolashaqqa bastar jol» joldaýynda Qazaq handyǵynyń 550 jyldyǵyn 2015 jyly atap ótý týraly usynysy osy tarıhı oqıǵa aınalasynda biraz qyzyǵýshylyq týdyryp, tek Qazaqstanda ǵana emes, shet elderde de qoǵamdyq rezonans týdyrǵanyn atap ótti.

Bul týraly QR SІM baspasóz qyzmeti habarlady.

«Hajetepe» ýnıversıtetiniń rektory konferentsııany ashý rásiminde Qazaqstan Túrkııa úshin strategııalyq seriktes memleket ekenin atap ótip, eki el arasyndaǵy gýmanıtarlyq yntymaqtastyqty belsendi jalǵastyrýǵa ázir ekenin bildirdi.

«Bul oqıǵa tek Qazaqstan halqy úshin ǵana emes, jalpy túrki álemi úshin erekshe is-shara eken dep bilemin. 550-jyldyq - ótken zamannyń sanaǵy ǵana emes, eńserýdi qajet etetin bolashaq beles. Bul - QR Prezıdenti N. Nazarbaevtyń «Máńgilik El» ıdeıasyn júzege asyrý múmkindikteriniń biri», - dedi M. Týnjer.

O. Horata túrkitildes memleketterdiń tarıhy jáne mádenı dástúrin zertteýde ortaq kúsh-jigerdiń qajettiligin atap ótti. Osyǵan oraı, Qazaq handyǵynyń 550-jyldyǵyn atap ótý is-sharasy memleket qalyptasýynyń tereń tamyrlaryn moıyndatqyzyp, baýyrlas Qazaqstan jerindegi memlekettilikti tarıhı dáleldeıtin bolady.

«Qazaq dalasy myńdaǵan jyldar boıy túrli órkenıetterdiń toǵysqan, uly kóshterdiń ótken jeri bolatyn. Bul jerde eýrazııalyq dalanyń uly aımaqtary ıgerilip, materıaldyq jáne rýhanı mádenıetteri tamyr tartty. Qazirgi tańda osynaý mádenıet jetistikteri búkil álemde moıyndalýda», - dep O. Horata málim etti.

Konferentsııa barysynda «Túrki tarıhyndaǵy Qazaq handyǵynyń róli», «Qazaq tili jáne túrki tilderdiń damýy», «Qazaq handyǵy tarıhyn zertteý jónindegi jańa derekter» jáne t.b. sektsııalyq otyrystar uıymdastyryldy.