BBC qazaqstandyq Silk Way Star jobasyn gýmanıtarlyq dıalog úlgisi dep jazdy

ASTANA. KAZINFORM — Brıtanııalyq BBC Armenııa men Ázirbaıjan arasyndaǵy beıbit kelisimniń keleshegi týraly saraptamalyq maqalada Qazaqstanda oryn alǵan epızodqa toqtaldy. Atalǵan jaıt Silk Way Star halyqaralyq án jobasynda bolǵan.

Maqala avtory aldymen Armenııa men Ázirbaıjan halqy 30 jyldan astam ýaqytqa sozylǵan qaqtyǵysty birjola toqtatyp, tatýlasýǵa daıyn ekenin jazady. Qos el qoǵamynyń mundaı nıeti tek saıası kelisimshart jasasý barysynda ǵana emes, sondaı-aq beıresmı is-sharalarda da jıi baıqalady.

Sımvoldyq máni bar sondaı bir sátke jurtshylyq byltyr qarasha aıynda Astanada ótken Silk Way Star baıqaýynda kýá boldy. Atalǵan jobaǵa QR Prezıdentiniń TRK men China Media Group de qatysqan bolatyn. Bul baıqaýǵa qazylyq etken ázirbaıjandyq ánshi Samıra Efendı armenııalyq ónerpaz Saro Gevorgıange joǵary upaı berip, sondaı-aq ony kópshilik aldynda qushaǵyna qysqan.

BBC-diń jazýynsha, mundaı qadamdardyń mańyzy zor, máni tereń. Bul uzaqqa sozylǵan qarýly qaqtyǵysqa qarapaıym halyq ta núkte qoıǵysy keletinin bildiredi. Al ázirbaıjandyq ánshiniń sózinshe, ol qatań synǵa ushyraýy múmkin ekenin túsinse de, dıalogke qadam jasaýdy jón sanaǵan.

Sonymen qatar, maqalada bul epızod beıtarap alańda — mádenıetaralyq jáne gýmanıtarlyq dıalog keńistigi sanalatyn Qazaqstanda bolǵany jazylǵan.

Eske salaıyq, buǵan deıin Silk Way Star Prezıdent Teleradıokesheni men CMG-diń jańa jobasy ekenin jazǵanbyz.

Astanada ótken Azııa elderi arasyndaǵy «Silk Way Star» halyqaralyq baıqaýy jobaǵa qatysýshy elderdiń bas telearnalarynan kórsetildi.

Fınaldyń tikeleı translıatsııasyn Jibek Joly telearnasy júrgizdi, al parallel efırler Ázirbaıjan, Tájikstan, Qyrǵyzstan jáne Mońǵolııada uıymdastyryldy.