Qazaqstan Lýkoıldyń Qarashyǵanaqtaǵy úlesin satyp alý týraly usynys jiberdi me – QazMunaıGaz jaýaby

ASTANA. KAZINFORM – Qazaqstan AQSh sanktsııasyna tap bolǵan reseılik «Lýkoıl» kompanııasynyń Qarashyǵanaqtaǵy úlesin 300 mln dollarǵa satyp alý týraly usynys ázirlep, jibergen. Nege.kz saıty óz derekkózine súıenip osyndaı málimet taratqan. 

«QazMunaıGaz» ulttyq kompanııasynyń baspasóz qyzmeti osy aqparat týraly pikir bildirdi.

Nege.kz-tiń jazǵanyna qaraǵanda, «Lýkoıl» kompanııasy Qarashyǵanaq pen Teńiz jobalaryndaǵy úlesin 26 kúnniń ishinde satyp úlgerý kerek. Sondyqtan «QazMunaıGazben» mámilege kelý reseılik kompanııa úshin osy jaǵynan tıimdi bolýy múmkin.

«Lýkoıldyń» Qarashyǵanaq jobasynda 13,5% úlesi bar. Byltyr osy úlesten 180 mln dollar tabys kórgen. 

«QazMunaıGaz» kompanııasy AQSh-tyń «Lýkoılǵa» sanktsııa salǵanyn eske salyp, buǵan deıin barlyq jaǵdaıǵa qatysty aqparat taratqanyn atap ótedi.

- Ózderińiz biletindeı, buǵan deıin AQSh «Lýkoıl» jarııa aktsıonerlik qoǵamyna qarsy sanktsııalar engizgen bolatyn. Birlesken jobalarǵa qatysýshylar qazir sanktsııa shekteýlerine de, syrtqy faktorlardyń yqtımal ózge de áserine de keshendi baǵalaý júrgizip jatyr. Baǵalaý quqyqtyq, qarjylyq jáne tehnıkalyq aspektilerdi eskere otyryp júrgiziledi. Joba Qazaqstan zańnamasy men kelisimshart mindettemelerine sáıkes belgilengen tártippen jalǵasady. Barlyq kelisimderde shekteý sharalary engizilgen jaǵdaıda is-qımyl tártibin aıqyndaıtyn sanktsııa týraly eskertýler kózdelgen. Atalǵan ereje sharttary qupııa, - dep jazylǵan kompanııanyń resmı málimetinde.

Eske salsaq, Energetıka mınıstriniń orynbasary Sanjar Járkeshov Úkimet otyrysynan keıin ótken baspasóz máslıhatynda sanktsııaǵa túsken «Lýkoıldyń» Qazaqstandaǵy jobalary týraly pikir bildirgen edi.