Qazaqstan Londonda halyqaralyq bilim berý syılyǵyn jeńip aldy
ASTANA. KAZINFORM — Qazaqstan Londonda Coursera Learning Excellence Award halyqaralyq syılyǵyna ıe boldy.
QR Ǵylym jáne joǵary bilim mınıstrligi Londonda ótken London FWD is-sharasy aıasynda Coursera Learning Excellence Award halyqaralyq syılyǵyna ıe boldy. Іs-shara Coursera jáne Udemy jetekshi bilim berý tehnologııalyq platformalaryn, sondaı-aq Eýropa, Taıaý Shyǵys jáne Afrıka (EMEA) elderindegi negizgi seriktesterdi biriktirdi.
Shara barysynda sondaı-aq halyqaralyq EY konsaltıngtik kompanııasy, Ulybrıtanııanyń Nationwide banki jáne Italııanyń bIP tehnologııalyq konsaltıngtik kompanııasy marapattaldy. Coursera kompanııasynyń bas dırektory Greg Harttyń (Greg Hart) jetekshiligimen ótken is-sharaǵa tsıfrlyq bilim berýdi damytý jáne bilikti kadrlar daıarlaý baǵytynda jumys isteıtin jetekshi halyqaralyq uıymdardyń basshylary qatysty.
— Qazaqstan bul marapatqa halyqaralyq onlaın oqytýdy joǵary bilim berý júıesine ıntegratsııalaý, sondaı-aq qazirgi ekonomıkada suranysqa ıe tsıfrlyq quzyretter men jasandy ıntellekt salasyndaǵy daǵdylardy damytý baǵytyndaǵy jetistikteri úshin ıe boldy. Qazaqstan men Coursera arasyndaǵy yntymaqtastyq 2022 jyly bastalǵannan beri birlesken bastama ulttyq joǵary bilim berý júıesin jańǵyrtýdyń strategııalyq mańyzdy baǵyttarynyń birine aınaldy, — delingen habarlamada.
Tsıfrlyq bilim berýdi damytý — QR Ǵylym jáne joǵary bilim mınıstrligi qyzmetiniń basym baǵyttarynyń biri. Vedomstvoda zamanaýı bilim berý tehnologııalaryn engizý, halyqaralyq onlaın oqytý platformalarymen yntymaqtastyqty keńeıtý, sondaı-aq stýdentterdiń qazirgi eńbek naryǵynda suranysqa ıe tsıfrlyq jáne ıkemdi daǵdylaryn qalyptastyrý baǵytynda júıeli jumys júrgizilip keledi.
Mınıstrliktiń joǵary bilim berýdi tsıfrlyq transformatsııalaý baǵytyndaǵy jumysy buǵan deıin de halyqaralyq deńgeıde moıyndalǵan bolatyn. Atap aıtqanda, 2025 jyly Ǵylym jáne joǵary bilim mınıstri Saıasat Nurbek Coursera Learning Hero Award syılyǵyna ıe boldy. Al 2026 jyly Coursera Learning Excellence Award syılyǵynyń berilýi osy jetistiktiń zańdy jalǵasy bolyp, elimizdiń tsıfrlyq bilim berý men jasandy ıntellekt salasyndaǵy ulttyq strategııasynyń júıeli túrde júzege asyrylyp jatqanyn kórsetti. Sonymen qatar bul jetistik stýdentterdiń alǵan bilimderi men daǵdylaryn is júzinde qoldanýyna, kásipkerlerdiń jańa býynyn qalyptastyrýǵa jáne startap ekojúıesin damytýǵa múmkindik beretin bastamalardyń aýqymy keńeıip kele jatqanyn aıǵaqtaıdy.
Qazaqstannyń 100 ýnıversıteti Coursera platformasyn paıdalanady
Bastamany iske asyrý nátıjesinde qazaqstandyq joǵary oqý oryndarynyń stýdentteri myńdaǵan halyqaralyq onlaın kýrsqa, álemniń jetekshi ýnıversıtetteri men salalyq seriktesteriniń kásibı sertıfıkattaý baǵdarlamalaryna qol jetkizip, tájirıbelik daǵdylaryn jetildirýge múmkindik aldy.
Búgin Coursera platformasynda 292 myńnan astam bilim alýshy sertıfıkat ıelenip, berilgen sertıfıkattardyń jalpy sany 682 myńnan asty. Oqýǵa jumsalǵan ýaqyttyń jıyntyq kólemi 5,35 mln saǵattan asyp, qazaqstandyq joǵary oqý oryndarynyń bilim berý baǵdarlamalary aıasynda 163 098 akademııalyq kredıt esepke alyndy.
2026 jyly QR Ǵylym jáne joǵary bilim mınıstrligi elimizdiń 100 joǵary oqý ornyna Coursera platformasyn paıdalanýǵa 38 184 lıtsenzııa bóldi.
Qazir elimizdiń 100-den astam ýnıversıteti Coursera kýrstaryn bilim berý baǵdarlamalaryna júıeli túrde engizip, onlaın oqytý nátıjelerin resmı joǵary bilim berý júıesi aıasynda taný tájirıbesin júzege asyrady.
Osydan buryn «Daryn» jastar syılyǵynyń úmitkerleri belgili boldy.
