Qazaqstan London-2012 Olımpıadasyna 45 joldama utyp aldy - Sport komıteti
ASTANA. 2 jeltoqsan. QazAqparat /Jasulan Amanbaıuly/ - Qazaqstan sportshylary 2012 jyly ótetin Jazǵy Olımpıada oıyndaryna 45 joldama utyp aldy.
Bul týraly búgin Astanada baspasóz máslıhatynda QR Týrızm jáne sport mınıstrligi Sport komıtetiniń tóraǵasy Elsııar Qanaǵatov málim etti.
«Jalpy búgingi ýaqytqa deıin bizdiń sportshylar 2012 jyly ótetin Jazǵy Olımpıada oıyndaryna 45 joldama utyp aldy. Kelesi jyly negizgi lıtsenzııalyq jarystardyń ótkiziletindigin eskersek, Qazaqstan óz joldamalarynyń sanyn Beıjiń Olımpıadasyna alǵan joldamalar sanynan asyrýdy josparlap otyr», - dep atap ótti E. Qanaǵatov.
Onyń aıtýynsha, otandyq sportshylar joǵary sportta óte bıik jetistikterge jetip otyr. Olımpıadalyq sport túrlerinen ótken Álem chempıonattarynda otandyq sportshylardyń jeńip alǵan medaldardyń rekordtyq sany tirkeldi.
«Qysqa ýaqyt ishinde qanjyǵamyz 15 medalmen tolyǵyp, Álem reıtingisinde Qazaqstan altyn medaldardyń sany boıynsha 22 orynǵa, al júlde sany boıynsha 14 orynǵa ornalasyp otyr. Buryn-sońdy osyndaı ýaqyt ishinde munshama medal túsip kórmegen. Bul otandyq sportshylardyń London Olımpıadasy qarsańyndaǵy daıyndyq deńgeıiniń joǵary ekendigin kórsetedi», - deıdi komıtet basshysy.
Mınıstrliktiń qazaqstandyq sportyshylardyń sapalyq kórsetkishterin baǵamdaı otyryp, kelesi jyly Qazaqstan quramasy Beıjiń Olımpıadasyna qaraǵanda, odan da úzdik óner kórsetetindigine senimdi. Sportshylarymyzdyń aýyr atletıkadan, bokstan, kúresten, jeńil atletıkadan kórsetken nátıjeleri Qazaqstannyń josparlaǵan medaldar sanyn jeńip alýǵa myqty áleýettiń baryn kórsetedi.
E. Qanaǵatov aıtyp ótkenindeı, Qazaqstan London Olımpıadasyna qatysty naqty jospar 8 jeltoqsan kúni arnaıy jedel shtabtyń otyrysynda keńinen pysyqtalmaq.
