Qazaqstan logıstıka tıimdiliginiń halyqaralyq reıtınginde joǵarylady
ASTANA. QazAqparat - Qazaqstan Dúnıejúzilik banki logıstıka tıimdiliginiń halyqaralyq reıtınginde (LPI) alty satyǵa joǵary kóterildi, dep habarlaıdy QazAqparat tilshisi qarjy ınstıtýtynyń resmı saıtyna silteme jasap.
2007 jyly Dúnıejúzilik bank Fınlıandııanyń Týrký qalasy ýnıversıtetimen birlesip, alǵash ret túrli elderdegi logıstıkanyń damý deńgeıin baǵalaý ádistemesin ázirlegen bolatyn. Sodan beri zertteý eki jylda bir márte ótkizilip keledi.
Aǵymdaǵy jyly Qazaqstan 160 memlekettik arasynda 71 orynǵa taban tiredi. Al osydan eki jyl buryn elimiz 77 orynda bolǵan edi. Qazaqstandaǵy kedendik rásimdeý tıimdiligi 21 satyǵa joǵarylap, 2016 jylǵy 86 orynnan 2018 jyly 65 orynǵa joǵarylady. Al júkterdi der ýaqytynda jetkizý boıynsha Qazaqstannyń kórsetkishi 42 satyǵa jaqsaryp, 2016 jylǵy 92 orynnan bıyl 50 orynǵa kóterildi.
Eske sala ketsek, LPI - Dúnıejúzilik bankiniń logıstıkalyq qyzmet tizbeginiń tıimdiligin baǵalaýdyń halyqaralyq reıtıngi. Onyń nátıjesi jalpy álemdik halyqaralyq ekspedıtorlyq kompanııalar men ekspress jetkizý qyzmetiniń málimetterine negizdeledi. Dúnıejúzilik banki LPI Indeksin eki jylda bir ret shyǵarady. Ol óz kezeginde memleketterge logıstıka júıesiniń múmkindigin tańdaýǵa yńǵaıly bolady.
Aıta keteıik, 2020 jyldary Qazaqstan logıstıkalyq qolaıly 40 eldiń qataryna kirýge nıetti. Ol úshin «QTJ» UK» AQ ulttyq logıstıkalyq operator retinde tıisti ınfraqurylymdy damytyp, kedendik resimdeýdi jeńildetip, tasymaldaýǵa aqparattyq tehnologııany engizýdi kózdeıdi. Onyń syrtynda, «Qazaqstan temir joly» kompanııasy Qazaqstannyń ǵalamdyq naryqtaǵy básekelestigin ósirý úshin aralas júkterdi tasymaldaý kólemin arttyrady. Osy maqsatta temir jol men áýekóligimen aralas tasymaldaý úshin jańa kólik ónimi - «Rail-Air» usyndy.
