Qazaqstan Lıvııaǵa astyq pen et eksportyn ulǵaıtýdy kózdeıdi
ASTANA. KAZINFORM- Qazaqstan men Lıvııa aýyl sharýashylyǵy ónimderiniń ózara saýdasyn keńeıtip, ásirese qazaqstandyq astyq pen et jetkizilimine basymdyq berýdi kózdep otyr. Ekijaqty yntymaqtastyqty damytý máseleleri Qazaqstannyń Aýyl sharýashylyǵy mınıstri Aıdarbek Saparov pen Lıvııa Memleketiniń Aýyl sharýashylyǵy jáne mal sharýashylyǵy mınıstri Abdýl Latıf Mohammed Al-Taher Hosnıdiń kezdesýinde talqylandy.
QR Aýyl sharýashylyǵy mınıstrligi baspasóz qyzmetiniń habarlaýynsha, Aıdarbek Saparov Lıvııamen saýda-ekonomıkalyq baılanystardy nyǵaıtý jáne otandyq agroónerkásip ónimderiniń Soltústik Afrıka naryǵyndaǵy úlesin arttyrý mańyzdy baǵyttardyń biri ekenin atap ótti.
-Biz Lıvııa naryǵyna sapaly ári básekege qabiletti aýyl sharýashylyǵy ónimderin jetkizý kólemin ulǵaıtýǵa daıynbyz. Eń aldymen, bul astyq daqyldary, sıyr jáne qoı etine qatysty. Bizdiń mindetimiz – qolda bar áleýetti naqty saýda jobalaryna aınaldyrý, iskerlik baılanystardy keńeıtý jáne Lıvııa naryǵynyń qajettilikterine saı turaqty jetkizý arnalaryn qalyptastyrý. Qazaqstannyń osy josparlardy júzege asyrýǵa jetkilikti resýrstyq múmkindigi bar, – dedi mınıstr otandyq agroónerkásip kesheniniń áleýetin tanystyra otyryp.
Qazaqstannyń óndiristik áleýeti eksport geografııasyn keńeıtýge berik negiz qalaıdy. Sońǵy eki jyl qatarynan elimizde astyq túsimi 27 mln tonnadan asty. Maıly daqyldar tuqymynyń óndirisi 4,8 mln tonnaǵa, al burshaq daqyldarynyń kólemi 1 mln tonnadan joǵary boldy. Sońǵy bes jylda aýyl sharýashylyǵy ónimderiniń eksporty eki ese ósip, 7 mlrd AQSh dollarynan asty.
Ótken jyldyń qorytyndysy boıynsha 15,3 mln tonna astyq eksporttaldy. Bul aldyńǵy jyldyń sáıkes kezeńimen salystyrǵanda 70%-ǵa kóp.
Eksport baǵyttaryn ártaraptandyrý jáne jańa naryqtardy ıgerý agroónerkásip salasyn damytýdyń negizgi basymdyqtary qatarynda qalyp otyr.
Abdýl Latıf Mohammed Al-Taher Hosnı aýyl sharýashylyǵy salasyndaǵy halyqaralyq baılanystardy nyǵaıtýdyń mańyzdylyǵyna toqtaldy. Onyń aıtýynsha, tıisti memlekettik organdardyń tikeleı ózara is-qımyly yntymaqtastyqtyń perspektıvaly baǵyttaryn aıqyndaýǵa jáne ekijaqty ónim jetkizý múmkindikterin keńeıtýge jol ashady.
-Biz yntymaqtastyqty keńeıtýge, kásibı tájirıbe almasýǵa jáne ózara ónim jetkizýge qosymsha múmkindikter jasaýǵa múddelimiz. Tikeleı dıalog ózara tıimdi baǵyttardy aıqyndap, saýda-ekonomıkalyq qarym-qatynasymyzǵa jańa serpin beretinine senimdimin, – dedi mınıstr.
Taraptar qazaqstandyq et ónimderiniń eksportyn keńeıtý perspektıvalaryna da erekshe nazar aýdardy. Qazirgi tańda Qazaqstanda iri qara mal sany 9,3 mln basqa, al usaq mal sany 24,3 mln basqa jetedi. Bul kórsetkishter mal sharýashylyǵyn damytýǵa jáne otandyq et ónimderin sheteldik naryqtarǵa jetkizý kólemin arttyrýǵa qajetti eleýli resýrstyq áleýetti qalyptastyrady.
Eksporttyq áleýetti is júzinde iske asyrý maqsatynda taraptar veterınarııalyq jáne fıtosanıtarııalyq yntymaqtastyq, ónim qaýipsizdigin qamtamasyz etý jáne saýda rásimderin jetildirý máselelerin qarastyrdy. Jetkiziletin ónimderge qoıylatyn talaptar men olardy Lıvııa naryǵyna shyǵarýǵa ruqsat berý sharttary aldaǵy ýaqytta pysyqtalmaq.
Osyǵan deıin Qazaqstannyń Kambodjaǵa bıdaı men et eksporttaýdy kózdep otyrǵany týraly jazdyq.
