Qazaqstan legıoner fýtbolshylarǵa bıýdjet qarjysynan jalaqy tóleýdi doǵarady
ASTANA. QazAqparat - Qazaqstan legıoner fýtbolshylarǵa bıýdjet qarjysynan jalaqy tóleýdi doǵarady. Bul týraly búgin QR Parlamenti Senatynyń Áleýmettik-mádenı damý jáne ǵylym komıtetinde «Dene tárbıesi jáne sport máseleleri boıynsha QR-nyń birqatar zańnamalyq aktilerine ózgertýler men tolyqtyrýlar engizý jónindegi» zań jobasyn talqylaý barysynda Mádenıet jáne sport vıtse-mınıstri Sáken Musaıbekov málim etti, dep habarlaıdy QazAqparat.
Onyń aıtýynsha, zań jobasyna sáıkes saralaý jolymen sporttyń basymdyqqa ıe olımpıadalyq túrleri qarjylandyrylatyn bolady. Sondaı-aq 5 ólshem boıynsha anyqtalyp, olardyń negizi halyqaralyq deńgeıdegi jetistikter bolmaq. Munan bólek, memleket qaryzyn bólýdegi jaýapty organ elimizdiń Ulttyq olımpıada komıteti bolyp bekitiledi.
«Biz tarıhta alǵash ret memlekettik tapsyrmany mınıstrlikten Ulttyq olımpıadalyq komıtetke bermekpiz. Bul olımpıadalyq sport túrleri federatsııalaryn damytý úshin jasalyp otyr. Árıne, bul sporttyń basqa túrleri qarjylandyrýsyz qalady degendi bildirmeıdi. Degenmen qazirgideı óz qalaýyńmen 100 paıyz bıýdjettiń 40-45 paıyzyn, keıbir oblystarda 50 paıyzyna deıin kásibı fýtbol klýbtaryn ustap turýǵa jumsaı almaısyz», - dedi vıtse-mınıstr.
Óz kezeginde QR MSM Sport jáne dene shynyqtyrý isteri komıtetiniń tóraǵasy Elsııar Qanaǵatov kásibı fýtbol klýbtarynyń ózderiniń demeýshileri bar ekendigin basa aıtty.
«Osy zańmen bıýdjet qarjysy esebinen legıonerlerge jalaqy tóleýdi múldem doǵarmaqpyz. Eger legıoner shaqyrǵyń kelse demeýshi, jeke qarajat tap. Saralaý joly arqyly sporttyń basymdyqqa ıe túrlerine qarjylandyrýdy arttyrǵymyz kelip otyr. Máselen baıdarka men kanoe esý Ońtústik Qazaqstan oblysynda basymdyqqa ıe bolǵanymen barlyq qurylymdarda iske qosylmaǵan. Balalar-jasópirimder sport mektebinde, oblystyq ınternatta, olımpıadalyq rezerv daıyndaý ortalyǵy men joǵary sporttyq sheberlik mektebinde baıdarka men kanoe esýden synyptar bolýy qajet. ıAǵnı sabaqtastyq bolýy tıis», - dedi Elsııar Qanaǵatov.
